Судење за „Титаник 3“: СЈО се сомнева дека се врши притисок врз сведок

Обвинителот на СЈО Љубомир Лапе на денешното рочиште за предметот „Титаник 3“ рече дека се сомнева оти врз сведокот Тулај Красниќи е извршен притисок или некој му се заканува.


Денешното рочиште почна со сведочење на Красниќи, во предметот во кој обвинети се Ејуп Аљими и Исмет Гури, бидејќи како членови на општинската изборна комисија во Чаир „уништувале изборен материјал“ на изборите во 2013 година.


На прашање на обвинителот Лапе, Красниќи рече дека на денот на гласањето отишла на избирачкото место и поради болест на нејзиното дете заминала дома и во 19 часот се вратила на избирачкото место, при што со член на комисијата ги однела изборните материјали во општина Чаир.


На прашање на Лапе дали се сеќава дека во СЈО дала исказ дека се плаши од агресивноста на Исмет Гури, сведокот рече дека не се сеќава ниту пак знае кој е тој.


Поради тоа обвинителот побара да биде прочитан записникот од исказот кој сведокот го дала во СЈО. Судскиот совет одлучи да не се чита исказот, со образложение дека сведокот кажала дека е под закана од Исмет Гури.


Одбраната одбиваше да го испрашува сведокот во директни испрашувања на што реагираше јавниот обвинител, а судот одлучи да се постават прашања и од страна на адвокатите на одбраната. Судењето продолжува со испрашување на уште четворица сведоци.