د جرمونو پر ضد نړیواله محکمه: خپل کار ته دوام ورکوو
په هاګ کې ددې محکمې ویاند فدي العبدالهي د سه شنبې په ورځ د ازادۍ راډیو خبري څانګې ته وویل، د جرمونو نړیواله محکمه یو خپلواک نړیوال قضايي بنسټ دی او د نړۍ ۱۲۳ هیوادونه یې ملاتړ کوي.
عبدالهي زیاته کړه، د قانون د یوې محکمې په توګه به دا بنسټ خپلو کارونو ته دوام ورکړي.
دا په داسې حال کې ده چې فرانسې د جرمونو پر ضد د نړیوالې محکمې په ملاتړ د یوې اعلامیې په خپرولو ویلي:
"دا محکمه د هغو امتیازونو په بنسټ چې لري یې، پرته له خنډه باید وکولی شي چې خپلو کارونو ته دوام ورکړي."
تر دې یوه ورځ مخکې د سپینې ماڼۍ د ملي امنیت سلاکار جان بولټن خبرداری ورکړی و که چیرې د جرمونو نړیواله محکمه په افغانستان پر امریکايي ځواکونو د جنګي جرمونو د لګیدلو تورونو په اړه څیړونو ته دوام ورکړي، امریکا به پر دې محکمې بندیزونه ولګوي.