اوکراین وايي پر روسیې د نړیوالو بندیزونو د نرمېدو خطر موجود دی
ولسمشر پروشنکو نن پنجشنبه د سپټمبر۲۰مه، د خپل پارلمان د کورني او بهرني سیاست کمېټې ته په وینا کې خبرداری ورکړ چې که روسیه د کریمیا ټاپو وزمه بېرته ورته ونهسپاري، پر روسیې د نړیوالو په بندیزونو کې نرمښت به د نړیوال قانون د ماتې معنی ولري.
روسیې په ۲۰۱۴ میلادي کال کې په زور د کریمیا ټاپو وزمه له اوکراینه جلا او له ځان سره الحاق کړه.
له هغه راهیسې د اوکراین د حکومتي ځواکونو او د روسیې د پلویانو بېلتون غوښتونکو ترمنځ په جګړه کې تر ۱۰ زره زیات وګړي وژل شوي دي.
امریکا او اروپايي اتحادیې د کریمیا د الحاق او د اوکراین په ختیځ کې له بېلتون غوښتونکو د روسیې د ملاتړ له امله پر روسیه بندیزونه ولګول.