د روسیې سان پیټرسبورګ ښار کې د کرونا له امله بندیزونه سختېږي
د دې بندیزونو له ډلې به یو دا وي چې که څوک له ګڼې ګوڼې ډکو مناسبتونو یا غونډو کې ګډون کوي، باید روغتیایي اجازه لیک له ځان سره ولري.
فرهنګي او ورزشي غونډو کې د ګډون دا محدودیت د نومبر له لومړۍ نېټې وروسته لګول کېږي او د سان پیټرسبورګ د مرستیال واليبوریس پیوتروفسکي په خبره، هغه وخت اجازه لیک ته اړتیا پېښېږي چې د ګډونوالو شمېر له ۴۰ زیات شي.
غونډو کې د ګډون دا اجازه هغو کسانو ته ورکول کېږي چې د کرونا ضد بشپړ واکسین یې ترلاسه کړی وي او یا یې هم د کرونا معاینه منفي ثابته شي.
د بندیزونو دا خبر وروسته تر دې خپریږي چې روسیه کې یو ځل بیا په کرونا د اخته کېدونکو کسانو شمېر لوړې کچې ته رسیدلی دی.
یوازې تېرو ۲۴ ساعتونو کې نژدې څلور دیرش نیم زره کسان دغه هېواد کې په کرونا اخته شوي دي.