مسکو کې د طالبانو ناسته او د بشري حقونو د څار د سازمان انتقاد
دا خبره د یاد سازمان د اسیا برخې د ښځو د حقونو مرستیالې هېدر بار په حواله بېګا په یوه راپور کې راغلې.
هېدر بار ویلي، د قطر د خبرو او تېرو تجربو ښودلې چې طالبان له ښځینه و استازیو سره هم لیدنې نه ردوي نو ولې د نړۍ هېوادونه یواځې نارینه استازي د هغو لیدنو ته ور استوي؟
بار ویلي، دا مساله ځکه ډېره مهمه ده چې طالبانو د دې په خبره په ټول هېواد کې د ښځو پر وړاندې سیسټماتیک تبعیض پیل کړی دی.
هغې له شپږم ټولګي پورته د نجونو د ښوونځیو تړل کېدو او د یو شمېر ښځینه وو کار کوونکو د کار ممانعت د بېلګې په توګه راوړي دي.
طالبانو تر اوسه پورې د بشري حقونو د څار سازمان د دغه راپور او څرګندونو په تړاو څه نه دي ویلي، خو مخکې یې ویلي وو چې د ښځو د کار او تعلیم لپاره د دوی په خبره د یوه شرعي چاپيریال په رامنځته کولو بوخت دي.