د کونړ مسوولین: سږکال نږدې زر ټنه غوزاڼ شوي
د دې ریاست د کرنیزو چارو امر نجیب الله عادل ازادي راډیو ته وویل:"سږکال په کونړ کې له ۹۰۰ نه تر ۱۰۰۰ ټنو پورې غوزانو حاصل ورکړی دی چې د تېرکال پرتله يې له لسو تر پنځلس سلنې پورې په کې زیاتوالی راغلی دی. سږکال يې بازار هم ښه دی او تر اتیا میلیونه افغانیو پورې به دهقانانو ته ګټه ورسیږي او دهقانان پرې ډېر خوشحاله دي."
خلک هم د غوزانو له سږني حاصلاتو خوښ دي، خو عام کونړیان وایي، په تېرو کلونو کې به هرې کورنۍ یوه اندازه غوزان اخیستل، خو سږکال د بې روزګارۍ، اقتصادي ستونزو او د غوزانو د نرخونو لوړوالي له امله يي نه شي کولی چې وایې خلي.
په کونړ کې د تېر حکومت مسولینو ویل چې د ولایت یو شمېر سېمو کې د نښترو ځنګلونه وهل شوي او دوی غواړي چې د ځنګل د بیا احیاء لپاره په کې د غوزانو بوټې نال کړي چې له یوې خوا به ورسره سېمه بېرته زرغونه شي او له بل لوري به د څو کالو په موده کې خلک نغد عواید ترې هم ترلاسه کړي.
د دې کار عملې کولو لپاره يې په ولسوالیو کې د ځنګل ساتنې او رغونې په نوم شوراګانې رامنځته کړي او همدا راز يې ورته د غوزانو د بوټو د روزلو لپاره قوريي هم جوړې کړي.