Në Brazil rritet numri i të infektuarve me koronavirus

Brazili ka regjistruar një numër të madh të rasteve të reja me koronavirus, duke u bërë vendi i dytë në botë me numrin më të madh të infektimeve, pas Shteteve të Bashkuara.

Tani, në Brazili ka kaluar Rusinë dhe në këtë shtet të Amerikës Latine janë 330,890 raste dhe 21,048 vdekje nga sëmundja COVID-19, që shkaktohet nga koronavirusi.

Numri ditor i vdekjeve në Brazil në tre ditët e fundit ka qenë mbi 1,000. Ekspertët shëndetësorë thonë se mungesa e testimeve bën që të dyshojnë se shifrat në Brazil të jenë edhe më të larta.

Ky lajm për rritjen e numrit të rasteve me koronavirus në Brazil, vjen një ditë pasi Organizata Botërore e Shëndetësisë tha se Amerika Jugore është “epiqendra e re” e pandemisë.

Presidenti i Brazilit, Jair Bolsonaro vazhdimisht ka kritikuar këshilltarët shëndetësorë, është shprehur kundër masave të izolimit dhe ka minimizuar rreziqet nga COVID-19.

 Sipas të dhënave të publikuara nga Universiteti Johns Hopkins, SHBA-ja ka mbi 1,6 milion raste dhe afro 96,000 të vdekur, ndërkaq, në Rusi janë konfirmuar 326,488 raste dhe 3,200 viktima nga koronavirusi.

Për lajmet e fundit rreth koronavirusit vizitoni blogun e Radios Evropa e Lirë.