Новости за 11.02.2024

Дар ғарби Туркманистон духтарони мактабхонро маҷбур мекунанд, ки аз санҷиши бакорат гузаранд. Ҳадаф баҳодиҳии ахлоқи духтарон ва пешгирӣ аз ҳомиладорӣ дар сини наврасӣ будааст. Дар бораи онҳое, ки аз ин санҷиш намегузаранд, ба Хадамоти амният хабар дода мешавад.

Мақомоти Кумитаи ҳолатҳои фавқулодаи Тоҷикистон мегӯянд, ба зудӣ дар кишвар барномаи мобилие дастрас мешавад, ки ба сокинон барои пешгирӣ аз хатари офатҳои табии ва сари вақт огоҳшудан аз ҳолатҳои фавқулода кӯмак мекунад.

Бошандагони Кӯлоб аз зиёд шудани сагҳои дайду ё велгард шикоят мекунанд. Чунин сагҳо ба қариб 800 нафар, аз ҷумла як кӯдак ҳамла карда, ба сиҳатии онҳо осеб расонидаанд.

Сарвазири собиқи Ҳолланд Дрис ван Агт якҷо ва ихтиёран бо ҳамсараш Эугения вафот карданд. Зану шавҳари 93 сола, ки аз бемории шадиде ранҷ мекашиданд, тасмим гирифтанд, бо роҳи “эвтаназия” ё марги бедард ба зиндагӣ хотима бахшанд. Дар Ҳолланд ба марг бо ин роҳ иҷоза дода шудааст.

Кишварҳои ҳамсояи Исроил ва калидӣ дар гуфтугӯҳои миёни "Ҳамос" ва Исроил аз паёмадҳои фалокатбори ҳамла ба ҷануби шаҳри наздимарзии Ғазза – Рафаҳ ҳушдор дода, аз Исроил хостанд, дар ин макон амалиёти низомӣ анҷом надиҳад.

Артиши Исроил эълон кард, ки дар зери бинои қароргоҳи Оҷонсии СММ дар умури кӯмак ба паноҳандаҳои фаластинӣ дар Ғазза нақби гуруҳи тундрави "Ҳамос"-ро  ошкор кардааст.  Дар он ба иддаои Исроил маркази иктишофии ҲАМОС ҷойгир буд. Оҷонсии СММ (UNRWA) гуфтааст, аз вуҷуди ин нақб хабар надошт.

Нишастҳои хабарие, ки дар Тоҷикистон идома доранд, баёнгари чӣ ҳастанд? Озодии сухан ва матбуот ё хок пошидан ба чашми матбуоту журналистҳо?

Нишастҳои хабарие, ки дар Тоҷикистон идома доранд, баёнгари чӣ аст? Озодии сухан, ё хок пошидан ба чашми журналистҳо? Бархе хабарнигорон мегӯянд, нишастҳои хабарӣ на маҳалле барои посух гирифтан ба суолҳо шудаанд, балки ба як минбари хондани ҳисоботи хушки вазорату идораҳо табдил ёфтаанд.