Шоҳиён: "Барои даст доштан дар ошӯбҳои ду зиндон 60 нафар ҷазо гирифтанд"
Додгоҳи олии Тоҷикистон мегӯяд, ба хотири даст доштан дар ошӯбҳои зиндони Хуҷанд ва зиндони Ваҳдат 60 нафар ҷазо гирифтаанд. Дар ин бора Шермуҳаммад Шоҳиён, раиси Додгоҳи олии Тоҷикистон рӯзи 3-юми феврал зимни нишасти матбуотӣ хабар дод. Аммо наздикони бархе аз маҳкумшудаҳо бо ҷурми иштирок ва ҳамдастӣ дар ошӯб дар зиндони шаҳри Ваҳдат, ҳукмро "ноодилона" хонда, бознигарии онро талаб карда буданд.
Раиси Додгоҳи олӣ ҳам гуфт, бархе аз маҳкумшудагон аз ҳукми додгоҳ норозигӣ карда, даъво карданд, ки онҳо дар содир кардани ҷиноятҳо даст надоранд ва ҷазо нисбати онҳо беасос аст. Шермуҳаммад Шоҳиён афзуд, ин шикоятҳо ҳатман баррасӣ карда мешаванд. Раиси Додгоҳи олӣ афзуд, қазияҳои ошӯб дар зиндонҳо паси дарҳои баста баррасӣ шудааст.
Дар ду ошӯб дар зиндонҳои шаҳри Хуҷанд ва Ваҳдат беш аз 50 нафар кушта шуданд, ки дар миёнашон зиндонбонҳо низ ҳастанд. Мақомот ҳарду ошӯбро кори дасти ҷангҷӯёни ДОИШ донистанд ва ин гурӯҳи даҳшатафкан низ масъулиятро пазируфт. Вале гурӯҳ ё созмонҳои мустақил ҳанӯз имкони таҳқиқи бетарафонаи ҳодисаҳоро надоранд.
Шермуҳаммад Шоҳиён, раиси Додгоҳи олӣ ҳамчунин гуфт, бар иловаи 60 нафар, ки ба иштирок ё даст доштан дар ошӯби зиндони Хуҷанд ва Ваҳдат гунаҳкор дониста шуданд, инчунин 30 нафари дигар дар интизори ҳукми додгоҳ ҳастанд. Ба гуфтаи ҷаноби Шоҳиён, ин 30 нафар барои омодагӣ ба ошӯб дар зиндони рақами 1-и шаҳри Душанбе муттаҳам дониста мешаванд. Дар бораи омодагӣ ба ошӯб дар зиндони рақами яки пойтахт иттилои пурра дар даст нест. Раиси Додгоҳи олӣ дар ин бора шарҳ надод.
Дар ду соли ахир дар ду зиндони Тоҷикистон ошӯбҳои хунин сар зад. Ошӯб дар зиндони шаҳри Ваҳдат моҳи майи соли 2019 ва ошӯб дар зиндони шаҳри Хуҷанд моҳи ноябри соли 2018 сар зад. Вале муҳокимаи муттаҳамонаш соли гузашта дар додгоҳҳо идома кард.
Human Rights Watch, созмони муътабари ҳомии ҳуқуқи инсон, рӯзи 14-уми январи имсол бо ишора ба ду ошӯб ва саркӯби зиндониён, мақомоти Тоҷикистонро ба даст доштан "дар шиканҷаи густарда, истифодаи номутаносиб аз нерӯҳои амниятӣ ва қатлу куштори зиндониён" муттаҳам кардааст. Мақомот ҳанӯз ба ин иттиҳом посух надодаанд.