Муҳсин Муҳаммадиев муқобили ситораҳои собиқи "Барселона" бозӣ мекунад
Шоми имрӯз, 30-юми август, дар шаҳри Бишкек бозии дӯстона миёни собиқ ситораҳои бошгоҳи футболи «Барселона»-и Испания ва собиқ ситораҳои футболи Осиёи Марказӣ баргузор мешавад.
Ин бозӣ ба муносибати ифтитоҳи Академияи «Барселона» дар шаҳри Ҷалолобод ва гузоштани капсулаи Академияи «Барселона» дар Бишкек доир мегардад. Барои ширкат дар ин маросимҳои ботантана президенти бошгоҳи футболи «Барселона» Жоан Лапорта ба Қирғизистон омадааст.
Дар ин дидор дар ҳайати ситораҳои собиқи «Барселона» иштироки Роналдинйо, Ривалдо, Карлес Пуйол, Хавйер Савиола, Роналд Де Бур, Жулиано Белетти, Франческо Коку, Людовик Жюли ва дигарон дар назар аст.
Дар қатори ситораҳои собиқи футболи Осиёи Марказӣ - Мирҷалол Қосимови узбек, Самад Смакови қазоқ, Амондурдӣ Аннадурдиеви туркман, футболбози машҳури тоҷик Муҳсин Муҳаммадиев низ ҳунарнамоӣ мекунад. Инчунин ба ин ҳайат Ҳидетоши Накатаи ҷопон, Андрей Канчелскиси русиягӣ ва дигарон шомиланд.
Бозиро собиқ довари машҳури ФИФА Равшан Ирматов, ки феълан муовини аввали раиси Федератсияи футболи Узбекистон аст, ҳамроҳи ёваронаш дар мусобиқоти қаҳрамонии ҷаҳон Абдуҳамидулло Расулов ва Баҳодур Қучқоров ҳакамӣ мекунанд.
Бозӣ дар Варзишгоҳи ба номи Долон Омурзоқови Бишкек соати 20:00 ба вақти маҳаллӣ (соати 19:00 ба вақти Душанбе) оғоз меёбад.