Ուսանողները դադարեցնում են պարտադիր զինվորական ծառայությունից տարկետման վերացման օրենքի դեմ դասադուլը և հացադուլը
Արմինֆո.Պարտադիր զինվորական ծառայությունից տարկետման վերացման օրենքի դեմ բողոքող ուսանողները դադարեցնում են գործադուլը և հացադուլը: Նման պայմանավորվածության են նրանք հանգել ԱԺ նախագահ Արա Բաբլոյանի և բանակցությունների նախաձեռնող՝ ԱԺ փոխնախագահ Էդուարդ Շարմազանովի հետ հանդիպումից հետո:
Ինչպես հայտնել է բողոքողների նախաձեռնող խմբի ղեկավար Դավիթ Պետրոսյանը, գոյություն ունի տարկետման հետ կապված խնդիր, ինչը անհրաժեշտ է քննարկել և ստեղծված իրավիճակից ելքեր գտնել: «Մենք առաջարկել ենք քննարկումներ անցկացնել կլոր սեղանի շուրջ՝ հասարակայնության տարբեր խմբերի, գիտական շրջանակների և իշխանությունների ներկայացուցիչների մասնակցությամբ: Մեր առաջարկն ընդունվել է, առաջին նիստը տեղի կունենա նոյեմբերի 22-ին: Խոստացել են, որ կապահովվի նաև ուղիղ եթեր: Ստեղծված իրավիճակում, երբ օրենքն արդեն ընդունվել է, պետք է ստեղծված իրավիճակից ելքեր գտնել: Եվ կլոր սեղանի անցկացումն այսօր լավագույն տարբերակն է»,- նշել է ուսանողը:
Ըստ որում, նրանք հավաստիացրել են, որ եթե իրենց դիրքորոշումը չընդունվի իշխանությունների կողմից, կշարունակեն պայքարը: Նա նաև նշել է, որ հանդիպման ընթացքում իշխանության ներկայացուցիչները խոստացել են մեզ, որ որևէ ճնշում բողոքի ակցիաներին մասնակցող ուսանողների վրա չի լինի: «Մենք պայմանավորվել ենք, որ այսուհետ իշխանության ներկայացուցիչներն ավելի կոռեկտ կլինեն մեր պայքարի առնչությամբ իրենց հայտարարություններում»,- հայտնել է ուսանողը: