Татарстанлылар хакимият органнарына татарча сирәк мөрәҗәгать итә башлаган
2023 елда татарстанлылар хакимияткә татарча сирәк мөрәҗәгать итә башлады. Узган елларда якынча 3 мең шундый мөрәҗәгать кабул ителгән булса, соңгы елда 918 булган. Бу хакта ТР Министрлар Кабинеты каршында Татарстан телләре турындагы законнарны гамәлгә ашыру советы утырышында республика мәгариф һәм фән министры Илсур Һадиуллин белдерде.
Аның мәгълүматлары буенча, узган ел дәүләт хакимиятенең башкарма органнары гражданнарның якынча 72 мең мөрәҗәгатен эшкәрткән. Аларга мөрәҗәгать язылган телдә җавап биргәннәр. Шул ук чорда җирле үзидарә органнары 50 меңнән артык мөрәҗәгать алган.