Новости за 19.04.2024

Зәй районы башлыгы Разиф Кәримов махсус хәрби операция зонасыннан ялга кайтан хәрбиләр белән очрашты. Очрашу «Дулкын» бассейнында узды. Бу хакта «Зәй яңалыклары»нда хәбәр ителә.

2024 елның июлендә Татарстанда һава температурасы климатик нормадан югарырак булыр дип көтелә. Җәйнең икенче ае безнең төбәктә инде бишенче ел рәттән эссе генә түгел, коры да булыр дип фаразлана. КФУның Экология һәм табигатьтән файдалану институты метеорология, климатология һәм атмосфера экологиясе кафедрасы доценты Тимур Әүһәдиев «Татар-информ» агентлыгына шулай дип белдерде.

19 апрельдә Азнакай районы Җиңү бистәсендә ТАССР авыл хуҗалыгы җитәкчесе, ике чакырылыш ТАССР Югары Советы депутаты, Бөек Ватан сугышы ветераны, Вахитов совхозы председателе булып эшләгән Степан Ниловның 100 яше тулу уңаеннан истәлек тактасын ачу тантанасы булды. Бу хакта «Азнакай» сайтында хәбәр ителә.

Бүген Теләче районында «Җомга марафоны» үткәрелде. Әлеге проектны Татарстан Республикасында яшәүче халыкларның татар телен һәм туган телләрен саклау, үстерү мәсьәләләре буенча ТР Рәисе каршындагы комиссия белән берлектә иҗтимагый «Терәк-Опора» хәйрия фонды оештырды. Бу хакта «Казан утлары» редакциясе хәбәр итә.

Татарстан Дәүләт Советы депутаты Альберт Яһудин республикада вакытны Мәскәү вакытына карата бер сәгатькә алга күчерергә тәкъдим итте. Парламентарий ТР Дәүләт Советының 53нче утырышында шулай дип белдерде.

Белгечләр «Россия – Ислам дөньясы: KazanForum 2024» ХV Халыкара икътисади форумында медицина туризмын үстерү һәм ислам дөньясы илләре пациентлары өчен хәләл хезмәтләр өлкәсендәге яңа мөмкинлекләр хакында фикер алышачак.

Татарстанда белгечләргә кытлык проблемасын мигрантлардан башка хәл итүе кыен булачак. Республика Премьер-министры Алексей Песошин ТР Дәүләт Советының 53нче утырышында шулай дип белдерде.

Күптән түгел ТР Дәүләт Советы Рәисе урынбасары Марат Әхмәтов гаиләле яшь (дөресрәге, урта буын) татар язучылары белән гаиләдә татар телен саклау турында сөйләште. Очрашуда катнашкан «Казан утлары» журналының баш мөхәррире Рөстәм Галиуллин үз тәкъдим-фикерләрен җиткерде.

Татарстанның ике кешесе РФ җирле үзидарәсенең мактаулы хезмәткәрләре булды. РФ Президенты Владимир Путин имзалаган указ хокукый мәгълүмат сайтында урнаштырылган.

Россия Президенты Владимир Путин дәүләт бүләкләре тапшыру турындагы указны имзалады. Бүләкләнүчеләр арасында Чаллы мэры Наил Мәһдиев тә бар.

Татарстанда Дәүләт автоинспекциясе тарафыннан электросамокатларда хәрәкәт итүчеләр арасында хокук бозуларны кисәтү һәм ачыклау рейдлары 5 апрельдә башланган.

Бүген Чаллы суды Татарстанның Тукай районы башлыгы Фаил Камаевка карата чик кую чарасын билгеләде. Аны 18 июньгә кадәр ике айга тикшерү изоляторына озаттылар. Бу хакта «Татар-информ» агентлыгына судның матбугат хезмәтендә хәбәр иттеләр.

Татарстанга аномаль эссе һава торышы килде – апрель уртасында шторм кисәтүе игълан ителде. КФУ профессоры, география фәннәре докторы Юрий Переведенцев «Татар-информ» агентлыгына һава торышы аномалиясенең сәбәпләре, Казанга кайчан чын җәй киләчәге хакында сөйләде.

2024 елның 26 апрелендә, бөек татар шагыйре Габдулла Тукайның туган көнендә, Санкт-Петербург үзәгендәге Тукай скверында традицион «Тукай укулары» узачак. Бу хакта Татарстанның Санкт-Петербург шәһәре һәм Ленинград өлкәсендәге Даими вәкиллеге матбугат хезмәте хәбәр итә.

Россия Президенты Владимир Путин Иминлек советының даими әгъзалары белән киңәшмә үткәрде. Бу хакта Кремльнең матбугат хезмәте хәбәр итә.

Төмән өлкәсе Тубыл шәһәренең «Ак калфак» иҗтимагый оешмасы, Иҗтимагый палата әгъзасы, җитәкче Айсылу Юнысова «Речесветик» төркеме белән балалар бакчасында чара үткәрде. Ул татар язучысы, шагыйре, Габдулла Тукайның туган көненә багышланган иде. Бу хакта Бөтендөнья татар конгрессы матбугат хезмәте хәбәр итә.

Татарстанда махсус хәрби операциядә катнашучылар һәм аларның гаилә әгъзалары салым бурычы булу-булмауга карамастан социаль ярдәм чаралары алачак. Депутатлар ТР Дәүләт Советының 53нче утырышында шул хактагы закон проектын кабул итте. Бу турыда «Татар-информ» хәбәрчесе Надежда Гордеева яза.

Инвестор Татарстанда чүп яндыру заводын төзү проектын 2025 ел ахырына кадәр гамәлгә ашырырга планлаштыра. Бу хакта ТР Дәүләт Советының 53нче утырышында республика Премьер-министры Алексей Песошин хәбәр итте.

Азәрбайҗан Президенты Илһам Алиев эш сәфәре белән Мәскәүгә килә. 22 апрельдә ул Россия Президенты Владимир Путин белән сөйләшүләр үткәрә. Кремль сайтында шул хакта хәбәр урнаштырылган.

Татарстанда зур сәнәгать предприятиеләрендә генә дә белгечләргә ихтыяҗ 11 мең кешедән артып китә, шуларның 80 проценты - төрле квалификациядәге эшчеләр. Бу хакта ТР Дәүләт Советының 53нче утырышында республика Премьер-министры Алексей Песошин хәбәр итте, дип яза «Татар-информ» хәбәрчесе Надежда Гордеева.

Казанда «Алга! Киттек» форумы башланды. Анда «Беренчеләр хәрәкәте» конкурсларында катнашкан якынча 1 мең лауреат һәм җиңүче җыелды. Бу турыда «Татар-информ» хәбәрчесе Арсений Кәримов яза.

Татарстан Дәүләт Советы депутаты, «Водоканал» МУП директоры Андрей Егоров парламентның Торак сәясәте һәм инфраструктура үсеше комитеты рәисе итеп сайланды. Карар Татарстан Дәүләт Советының 53нче утырышында кабул ителде. Бу турыда «Татар-информ» хәбәрчесе Надежда Гордеева яза.

Бүген кич һәм төнлә Татарстанда һава торышы начарлануы көтелә. Бу турыда Татарстан Гидрометеорология һәм әйләнә-тирә мохитне күзәтү үзәге хәбәр итә.

Татарстанда төзекләндерү буенча 7 проект Россиядә иң яхшылар рәтенә керде. 2017 елдан мондый проектларны ТР Төзелеш, архитектура һәм торак-коммуналь хуҗалык министрлыгы сайлап ала. Бу турыда Татарстан Шәһәрләрне үстерү институтында хәбәр иттеләр.

Татарстан Дәүләт Советы депутат Рәис Сөләйманов вәкаләтләрен вакытыннан алда туктатты. Карар парламентның 53нче утырышында кабул ителде. Бу турыда «Татар-информ» яза.