Новости за 24.04.2018

Авганистанските власти соопштија дека во нови напади на талибанците загинале најмалку 9 војници и полицајци. Според нив, во покраината Фарах биле убиени пет војници, а двајца повредени кога нивниот контролен пункт бил нападнат од талибанците. Во борбите на контролниот пункт кои траеле неколку часа загинале и 6 талибанци, а тројца биле повредени. Талибанците преземаа одговорност и за нападот во покраината Газни каде загинаа четворица припадници на локалните полициски сили, а седум биле повредени.

Голем дел од западните и од регионалните медиуми ја оценија турнејата на моторџиската група „Ноќни волци“, наречена „Руски Балкан“, како уште еден обид за ширење на руското анти-НАТО влијание на Балканот, па дури и предупредија дека тоа може да предизвика сепаратизам. Моторџиите негираат политика.

Шефовите на дипломатиите на земјите на Групата седум индустриски најразвиени земји на состaнокот во Торонто зазедоа единствен став против Русија, наведувајќи дека ќе ги бранат нивните демократии против мешањето во изборните процеси за што ја обвинуваат Москва. Канадската министерка Кристија Фриленд оцени дека Русија треба да биде казнета, бидејќи ги дескридитира изборите во неколку западни земји, како и поради труењето на рускиот екс шпион Сергеј Скрипал и неговата ќерка Јулија во Британија.

Надворешно политичкиот комитет на Сенатот ја поддржа кандидатурата на Мајк Помпео за државен секретар на САД. По вчерашното гласање, Помпео кој е шеф на ЦИА во моментов и е избор на претседателот Доналд Трамп, има добри шанси да го преземе раководењето на американската дипломатија. Сенатот треба да го потврди неговиот избор во текот на оваа недела.

Претседателот на Европскиот совет Доналд Туск денеска во Тирана ја почнува турнејата по Западен Балкан во текот на која до 27 април ќе ги посети и Подгорица, Белград, Приштина, Сараево и Скопје. Како што е соопштено во Брисел, Туск ќе упати порака дека Европската унија и останува најсигурен партнер на целиот регион и оти мајскиот самит на 17 мај во Софија ќе ја потврди европската перспектива на регионот.

Турнејата „Руски Балкан“ на руската моторџиска група „Ноќни волци“ во западните и во регионалните медиуми е оценета како ширење на руско антизападно влијание. Угледниот магазин „Њузвик“ директно праша: „Дали оваа турнеја на Ноќните волци може да биде поттикнување сепаратистички конфликти?“.

Комисијата за европски прашања на Собранието на Македонија и Мешовитиот Парламентарен Комитет РМ-ЕУ денеска ќе оддржат седница по повод Извештајот за напредокот на Македонија за 2018 година од страна на Европската комисија. Извештајот ќе го презентира амбасадорот на ЕУ Семуел Жбогар, а на седницата свое обраќање ќе има и премиерот Зоран Заев. Заклучни согледувања на седницата ќе даде Даниел Сервер од Универзитетот „Џон Хопкинс“ во Вашингтон.

Безбедносните служби во Канада ги истражуваат причините за инцидентот во Торонто во кој загинаа 10 пешаци. Според полицијата, возачот намерно го насочил своето комбе во толпата. Сепак, тие исклучуваат негова поврзаност со терористички организации.

„Обидите да се вовлече Македонија во НАТО против волјата на значителен број нејзини жители по примерот на Црна Гора се опасен експеримент“, изјави претседателката на рускиот Совет на федерацијата Валентина Матвијенко во Горниот дом на парламентот на Босна и Херцеговина. Според неа, ваквиот чекор ќе води кон натамошна дестабилизација на ситуацијата во регионот и ќе го поткопа европскиот безбедносен систем. Таа додаде дека Русија не ја следи таквата конфронтирачка логика и оти е заинтересирерана за мир и стабилност во Босна и Херцеговина.

Десет луѓе загинале, а 16 биле ранети во Торонто каде што комбе во полна брзина удри во пешаци, соопшти синоќа канадската полиција, наведувајќи дека возачот бил приведен. Властите ја исклучија можноста дека станува збор за тероризам. Возачот е идентификуван како Алекс Минасијан кој е на возраст од 25 години. Инцидентот се случил во време кога во Торонто се одржува состанок на шефовите на дипломатиите на земјите на Групата седум индустриски најразвиени земји во светот.

Во Македонија ќе биде сончево со мала до умерена облачност. Попладне облачноста на места ќе се зголеми и ќе има услови за краткотраен локален дожд со ретки грмежи. Максималната температура ќе се движи од 21 до 30 степени. Во Скопје и околината слично време со температура до 28 степени.