سلیم: په غزني کې سل تنه افغان ځواکونه یا وژل شوي او یا تری تم دي
دغه څرګندونې د افغان ځانګړو ځواکونو ویاند جاوید سلیم کړي او ویلي یې دي چې دغه ځواکونه به په غزني ښار کې دننه د جګړو یا د غزني ولایت په ولسوالیو کې د نښتو په نتیجه کې وژل شوي او یا تری تم شوي وي.
سلیم دغه راز وویل چې په غزني کې د څلورو ورځو جګړو په نتیجه کې د طالبانو د لږترلږه دونیم سوه وسله والو د وژل کېدو خبر ورکړل شوی دی.
د افغان ځانګړو ځواکونو ویاند وویل چې په غزني کې د ځواکونو د ملاتړ لپاره له کابله نوي ځواکونه غزني ته په لاره دي.
په غزني کې چې جګړې نن دوشنبه څلورمې ورځې ته غځېدلي، د نړیوالو ځواکونو یوه ویاند وویل چې د افغان امنیتي ځواکونو د ملاتړ لپاره یې پوځي سلاکاران غزني ته استولي دي.
په عین حال کې د غزني قومي مشرانو، مدني فعالانو او یو شمېر ځوانانو نن په کابل کې د غرني ښار د روان وضعیت په اړه یو اعتراضي لاریون وکړ.
د غزني د ولایتي شورا مرستیال امان الله کامراني ازادي راډیو ته وویل چې طالبانو په غزني کې جګړه پراخه کړې او حکومت يې باید د مخنیوي لپاره بېړني او جدي ګامونه پورته کړي.