د کونړ چارواکي:۳۰ زره ماشومان د پولیو ضد له واکسینه محروم شوي
د کونړ د عامې روغتیا ریاست وايي چې ۳۰ زره ماشومان د پولیو یا د کوچنیانو د فلج پر ضد له واکسینه محروم شوي دي.
د کونړ د عامې روغتیا رئيس ډاکټر عزیز الرحمن ساپي نن د ازادي راډیو خبریال ته ویلي چې په ډېرو سیمو کې وسله وال د پولیو د واکسین له کمپاین سره مخالفت کوي.
ښاغلي ساپي وویل چې د کونړ په یو شمېر ولسوالیو کې وسله والو ډلو له واکسین سره مخالفت زیات کړی دی.
د روغتیا نړیوال سازمان وايي چې افغانستان د نړۍ په وروستیو هېوادونو کې دی چې د کوچنیانو ګوزڼ د ماشومانو ژوند له جدي خطر سره مخامخ کړي دي.