ایران: د امریکا د سمندري ځواکونو یو پخوانی سرتېری نیول شوی
نیویارک ټایمز ورځپاڼې د دوشنبې په ورځ خبر ورکړچې ۴۶ کلن مایکل وایټ چې کله ایران ته د جولای په میاشت کې تللی و، نیول شوی دی.
د ایران دولتي اژانس ایرانا پرون د بهرنیو چارو د وزارت د ویاند بهرام قاسمي په وینا خبر ورکړ چې مایکل وایټ نیول شوی دی، خو دا یې ونه ویل چې د هغه جرم څه دی او کله نیول شوی دی؟
قاسمي زیاته کړه چې ایران په لومړیو ورځو کې د متحد ایالتونو حکومت خبر کړی و چې دا کس په مشهد کې نیول شوی دی.
نیویارک ټایمز د وایټ د مور جوانا خبره هم رااخېستې ده چې وایي، درې اوونۍ مخکې خبره شوه چې زوی یې د ایران په زندان کې دی. جونا وایي چې د ده زوی پنځه شپږ ځله مخکې هم ایران ته تللی و ترڅو خپله ایرانۍ ملګرې وویني.
له دې پېښې سره ښایي د واشنګټن او تهران ترینګلي اړیکې نورهم پسې خراب شي.