د صربيا ولسمشر: د چا پر وړاندې ګواښونو ته اجازه نه ورکوو
وړمه ورځ د اپوزيسيون ملاتړو د دولتي ټلوېزيون پر ودانۍ يرغل ور وړ او د لنډې شېبې لپاره يې ونيوله.
دوى د هغه څه له کبله مظاهره وکړه چې دوى استبدادي واکمني او د دولتي رسنيو لهخوا د دوى د مظاهرو په اړه مغرضانه نشرات وبلل.
خو ولسمشر الکساندر ووچيچ پرون يکشنبه په بلګراد کې د جمهوري رياست په ودانۍ کې وويل:
"صربيا به هېڅکله د چا په وړاندې تاوتريخجنو ګواښونو ته اجازه ورنهکړي. هغه کسان چې فکر کوي کولاى شي د زور زياتي، تاوتريخوالي او پر خلکو د فزيکي حملو په نتيجه کې سياسي لاسته راوړنې ولري، په غلطه دي."
پرون په زرګونو کسانو د جمهوري رياست ودانۍ ته څېرمه د څو ساعتونو مظاهره وکړه او د ولسمشر د استعفا غوښتنه يې وکړه.
د ګڼو پوليسو له حضور سره- سره په لسګونو نورو کسانو د صربيا په پلازمېنه کې د پوليسو له يوه مرکز دباندې مظاهره وکړه.
دوى د هغو کسانو د خوشې کېدو غوښتنه وکړه چې د دولتي ټلوېزيون د ودانۍ د نيول کېدو پر مهال نيول شوي دي.