د امریکا د ملي امنیت یوه پخواني قراردادي د محرمو اسنادو غلا کول منلي
نوموړي دا اعتراف له محکمې سره په هغه توافق کې کړی چې ښايي له مخې یې دې سړي ته د نهو کلونو د بند سزا ورکړل شي.
۵۴ کلن هارولډ ټي. مارټین د مارچ په اته ویشتمه د بالتیمور په یوې فدرالي محکمه کې پر ځان لګېدلی یو تور ومانه.
مارټین له یو شمېر خصوصي شرکتونو سره هم کار کړی او دا امنیتي تضمین یې درلود چې ډېرو پټو (اشد محرم) معلوماتو ته لاسرسی ولري.
نوموړی دوه کاله مخکې د هغه څه لپاره ونیول شو چې ښايي په تاریخ کې د محرمو اسنادو لویه رسوايي وی.
نوموړي له ۲۰۱۶ میلادي کال له اګسته د امریکا د فدرالي ادارو په توقیف کې دی.
د امریکا د فډرالي تحقیقاتو اداره یا ایف بي ای وايي، کله یې چې په ۲۰۱۶ میلادي کال کې د دې سړي پر کور په بالتیمور کې چاپه ووهله، نو د اسنادو بستې او د پنځوس (ټیرا بایټ) په ظرفیت د برښنايي اسنادو د زېرمه کولو وسایل یې ترلاسه کړل چې په کې د محرمو اسنادو په شمول حکومتي اسناد راټول شوي وو.
څارنوالان وايي، د مارټین دې کار دښمنانو ته د امریکا د ډېرو پټو معلوماتو د رسوایۍ خطر رامنځته کړی و.