په فاریاب کې چارواکي د سېلابونو له امله د ۱۰ تنو د مړینې خبر ورکوي
په فاریاب کې چارواکي د سېلابونو له امله د لسو تنو د مړینې خبر ورکوي.
د والي ویاند احمد جاوید بیدار ازادي راډیو ته وویل:
"په تېرو دوو درېیو ورځو کې چې په فاریاب کې سېلونه راغلي دي، شااوخوا لس تنه وژل شوي، پنځه ویشت تنه ټپيان شوي او دوه تنه تری تم دي."
د فاریاب په پشتون کوټ، خواجه سبزپوش، شیرین تګاب، دولت اباد او قُرغان ولسوالیو کې او همداراز په مرکز میمنه کې سېلابونه بهېدلي دي.
په تېرو درېیو ورځو کې د چارواکو په وینا، دې سېلابونو زرګونه کورونه وران کړي، زرګونه جریبه ځمکې یې لاندې کړي او شااوخوا دوه زره څاروي یې وژلي دي.