د عراق د نوي صدراعظم او د ايران د ولسمشر ليدنه؛ پر ګډه همکارۍ يې خبرې کړي
د ایران رهبر ایت الله علي خامنه اي، پرون سې شنبه په تهران کې د عراق له نوي صدراعظم محمد شیاع السوداني سره په خبرو کې د بغداد پر هغه تعهد شک وښود، چې د دواړو هېوادونو پر پوله یې د امن د ټینګښت په برخه کې کړی و.
د فرانسې خبري اژانس د راپور لهمخې په وروستیو کې د ایران او عراق اړیکې د ایران له قلمرو دباندې د کردانو پر تبعید شویو ډلو د تهران د حملو له کبله ترینګلې شوې دي.
تهران د کردانو دغه ډلې په ایران کې ناکراریو ته په لمن وهلو تورنې کړې دي.
د ایران رهبر ایت الله علي خامنه اي د السوداني د دې وعدې په ځواب کې چې ویې ویل، اجازه نه ورکوي د عراق له خاورې د ایران د امن د خرابۍ لپاره کار واخیستل شي وویل، له بده مرغه دا مهال دا کار د عراق په ځینو سیمو کې کېږي.
د عراق نوي صدراعظم د ایران له ولسمشر ابراهیم رئیسي سره تر کتنې وروسته د ایران له رهبر سره خبرې وکړې.
محمد شیاع السوداني د ایران له ولسمشر ابراهیم رئیسي سره د ټروریزم په وړاندې پر مبارزه، متقابل امنیت، اقتصادي همکاریو او د دواړو هېوادونو پر کلیدي لومړیتوبونو بحث وکړ.
السوداني په وروستیو کې په عراق کې د سیاسي ډلو ترمنځ د دولت د ایجاد پر سر تر یو کلنې لانجې وروسته د عراق صدراعظم شو او دا یې تهران ته لومړی رسمي سفر و.
په عراق کې دغه لانجه د ۲۰۲۱م کال د اکتوبر میاشتې تر پارلماني ټاکنو وروسته پیل شوه.
د ایران ولسمشر ابراهیم رئیسي د عراق له صدراعظم السوداني سره په ګډ خبري کنفرانس وویل، چې د ایران او د عراق د دولت له نظره د سیمې امنیت، سوله، همکاري او ثبات ډېر اهمیت لري.
د عراق صدراعظم ویلي چې دولت به یې هېڅ ډلې یا لوري ته اجازه ور نهکړي، چې د عراق له خاورې د ایران د امن د کمزورۍ او ګډوډۍ لپاره کار واخلي.
د فرانسې خبري اژانس د راپور لهمخې، په ایران کې د وروستیو اعتراضونو له پیله ایراني چارواکو د عراق په شمال کې د کردانو تبعید شوې ډلې په ایران کې ناکراریو ته په لمن وهلو تورنې کړې دي.
د سپټمبر میاشتې په نیمايي کې دغه اعتراضونه وروسته له هغې پیل شول، چې یوې ۲۲ کلنې ښځې مهسا امیني چې په بشپړ ډول د حجاب نه رعایت په تور نیول شوې وه، د پولیسو تر توقیف لاندې په کوما حالت کې روغتون ته ولېږدول شوه او هلته یې ساه ورکړه.
که څه هم د عراق مرکزي حکومت په بغداد کې د ایران سفیر د سپټمبر میاشتې په وروستیو کې احضار کړی و، څو د هغو راکټي او د بې پېلوټه الوتکې د حملو په باب ورته شکایت وکړي، چې لږ تر لږه ۷ کسان یې له کبله وژلي وو، خو ایران بیا هم د عراق د شمال په کورواکې سیمه کردستان کې د ایراني کردانو د ډلو پر ضد خپلې حملې تېره میاشت بیا پیل کړې.