Сафари Попи Рум ба Ироқ ба анҷом расид
Боздиди таърихии раҳбари католикҳои ҷаҳон аз Ироқ рӯзи 8-уми март ба анҷом расид. Дар чор рӯзи гузашта Поп Франсис дар баробари мулоқот бо раҳбарони ҷомеаву раҳбарони масеҳиёну мусалмонони кишвари ҷангзадаи Ироқ, инчунин дар як маросими намозгузорӣ ба хатми ҷангу хушунат даъват кард. Попи 84-соларо то ҳавопаймояш дар фурудгоҳи Бағдод президенти Ироқ Баҳром Солеҳ ҳамроҳӣ кард. Попи Рум дар ин сафар аз чор шаҳр, аз ҷумла Мосул дидан кард, ки чанд сол пеш пойгоҳи ҷангҷӯёни гурӯҳи “Давлати исломӣ” буд. Ӯ дар сӯҳбатҳояш таъкид кард, ки “сулҳ қавитар аз ҷанг аст”. Ӯ гуфт, Ироқ “ҳамеша бо ман ва дар дили ман хоҳад буд”. Дар як мулоқоти таърихии дигараш Попи Рум бо раҳбари шиаён Оятуллоҳ Алии Сиистонӣ мулоқот намуд.
Пеш аз сафари рӯҳонии мӯътабари католик нигарониҳо аз паҳншавии коронавирус дар миёни издиҳоми мардум, ки ба пешвози ӯ баромаданд, садо дод. Дар Ироқ мизони олудагӣ ба COVID-19 баланд гуфта мешавад. Худи Поп ва ҳайати ҳамроҳонаш пеш аз сафар эм карда шуданд.