Гузоришҳо аз суқути Шерхон Бандар ба дасти Толибон. Мақомоти тоҷик мегӯянд, "вазъ ором аст"
Дар пайи нашри хабарҳо дар робита ба суқути Шерхон Бандар -- муҳимтарин гузаргоҳи гумрукиву тиҷоратии Тоҷикистону Афғонистон ба дасти Толибон, мақомоти маҳаллӣ дар вилояти Хатлон мегӯянд, ки вазъ дар марз бо ин минтақа ором аст.
Расонаҳои мустақил дар Афғонистон иттилоъ доданд, ки субҳи сешанбе Толибон гузаргоҳи Шерхон Бандарро тасарруф карданд. Аз ҷумла "Khaama press" навишт, ки "субҳи имруз, сешанбеи 22-июн марзи байни Тоҷикистон дар вилояти Кундуз ба дасти Толибо суқут кардааст". Ин дар ҳолест, ки мақомоти расмии Афғонистон то кунун хабари ба дасти Толибон афтодани ин бандари муҳимро тасдиқ ё рад накардаанд.
Як манбаъ дар ҳукумати ноҳияи Ҷайҳуни вилояти Хатлон -- ҳаммарз бо Шерхон Бандари вилояти Кундузи Афғонистон, рӯзи 22-юми июн дар сӯҳбат бо Радиои Озодӣ гуфт, ки "вазъият комилан ором аст ва ҳеҷ мушкиле нест".
Ӯ ҳамзамон хабарҳо дар мавриди ба ҷониби Тоҷикистон паноҳ овардани шуморе аз неруҳои амниятии Афғонистон пас аз ба дасти Толибон афтодани Шерхон Бандаро рад кард ва гуфт, ки "ин гапҳо нодуруст ҳастанд". Ин манбаи Радиои Озодӣ афзуд, "тибқи маълумоти онҳо, марз зери назорат аст ва вазъ комилан ором мебошад".
Аммо ҳануз маълум нест, ки рафтуомад тариқи ин гузаргоҳи муҳими марзӣ идома дорад ваё қатъ шудааст. Як корманди гузаргоҳи Панҷи поён дар посух ба суоли Радиои Озодӣ танҳо гуфт, ки "вазъ тинҷ аст" ва аз шарҳи бештар худдорӣ кард.
Ба иттилои расонаҳои афғонӣ, Толибони силоҳбадаст инчунин минтақаҳои дигари вилояти Кундузро иҳота кардаанд. Маркази ноҳияи Имом Соҳиб, ки Шерхон Бандар тобеи он мебошад, рузи гузашта ба контроли Толибон даромада буд.
Пулиси ин вилоят мегӯяд, 20-уми июн Толибон амалиёт дар Кундузро оғоз намуда, нисфирӯзии 21-уми июн маркази ин вилоятро иҳота карданд. Ба иттилои Иномуддин Раҳмонӣ - сухангӯйи пулиси Қундуз, Толибон роҳҳои пайвасткунандаи ин вилоят бо дигар манотиқи Афғонистонро зери тасарруф қарор додаанд.
Тоҷикистон бо Афғонистон беш аз 1400 километр марзи тӯлонӣ ва душворгузар дорад. Роҳи аслие, ки Тоҷикистонро бо Афғонистон мепайвандад, гузаргоҳи Шерхон Бандар (аз тарафи Афғонистон) ва Панҷи Поён (аз тарафи Тоҷикистон) аст.
Тайи чанд рӯзи ахир вазъ дар вилоятҳои шимолии Афғонистон ҳаммарз бо Тоҷикистон нооромтар шудааст ва чанд ноҳия дар вилоятҳои Кундуз, Тахор ва Балх ба дасти Толибон афтодааст. Мақомот дар Кобул ҳамзамон аз бозпас гирифтани чанд ноҳия дар шимоли Афғонистон аз дасти Толибон хабар доданд.