Täjigistanda esgerleri urup-ýenjenler uzak möhletli türme tussaglygyna höküm edildi
Täjigik polkownigi, bir seržant we alty sany öňki esger ýaş esgerleriň urlup-ýenjilmeginde günäkär tapylyp, uzak möhletli türme tussaglygyna höküm edildi.
Çeşmeleriň 31-nji maýda Azatlyk radiosynyň Täjik gullugyna beren habaryna görä, Ýokary kazyýet bir gün öň harby gullukçylaryň arasyndaky gatnaşyklar boýunça harby düzgünleri bozmakda aýyplanan adamlary 9 ýarym ýyldan 11 ýarym ýyla çenli aralykda azatlykdan mahrum etdi.
Günäkärlenýänler aprel aýynda, bir topar esgeriň urlup-ýenjilişini we kemsidilişini görkezýän wideo internetde peýda bolanyndan soň tussag edildi.
Bu wideo Merkezi Aziýa ýurdunda hökmany iki ýyllyk gulluga çagyryş möwsüminiň başlanan wagtynda çap edilip, halk köpçüliginde ullakan gahar-gazap döretdi.