Алматыда тәртіп сақшылары Наурыз мерекесін атап өтті
22 сәуірде Алматы қалалық Полиция департаменті, ІІМ М. Есболатов атындағы Алматы академиясы мен Алматы қаласы бойынша Қылмыстық атқару-жүйесі департаментінің жеке құрамы бірігіп, "Наурыз мейрамын" тойлады, - деп хабарлайды Tengrinews.kz тілшісі.
Барлық мерекеде қоғамдық қауіпсіздікті сақтау күзетінде тұратын тәртіп сақшылары бұл күні өздері Ұлыстың ұлы күнін атап өтті.
"Наурыз мерекесін" Алматы қаласы Полиция департаменті Ішкі істер органдары мен Ұлттық ұлан ардагерлер кеңесінің төрағасы милиция генерал-майоры Сағынжан Асыл-Кеней құттықтау сөзбен ашып, ел тыныштығы үшін еселі еңбек етіп жүрген полиция қызметкерлерін Ұлыс күнімен құттықтады.
Мерекеге қатысқан департаменттер мен Алматы академиясы арасында "Үздік қазақ үй", "Ең дәмді наурыз көже" және "Үздік ұлттық дәстүр" конкурстары ұйымдастырылды. Сондай-ақ боз кілем үстіндегі балуандар күресі де қызу өтті. Мереке салтанатына жиналғандар Жедел қимылдайтын арнайы жасақ (СОБР) көрсеткен бағдарламаны қызыға тамашалады.
Алматы академиясының оқу-далалық лагерінде өткен мерекеде Алматы қаласы Полиция департаменті - "Ынтымақ ауылы", Алматы қаласы бойынша қылмыстық-атқару жүйесі департаменті - "Ырысты ауылы", Алматы қаласы Полиция департаментінің аппараты "Жібек жолы ауылы", Ішкі істер министрлігі М. Есболатов атындағы Алматы академиясы - "Қаратау ауылы"; Алматы қаласы Полиция департаментінің аудандық басқармалары - "Алатау ауылы" деп аталатын қазақ үйлер тігіп, қазақтың салт-дәстүрлерін көрсетті. Алматы қаласы ПД "Қыз ұзату", "Шілдехана", "Бесік той", ҚАЖД "Тұсау кесу", ІІМ Алматы академиясы "Беташар" сияқты атадан балаға мирас болып келе жатқан мағынасы мен тәлімі мол қойылымдарды көрсетті.
Ұлыстың ұлы күніне арналған салтанатты мереке соңында Алматы қаласы Полиция департаменті Ішкі істер органдары мен Ұлттық ұлан ардагерлер кеңесі төрағасының орынбасары Бауыржан Рахимов "Наурыз мейрамының" маңызына тоқталып, жеңімпаздарды марапаттады.
"Күллі мұсылман халқына ортақ мереке - Наурыз мерекесі ынтымақ пен берекені, бейбітшілік пен мерекені ұлықтайтын мереке. Бүгінгі наурыз мерекесінде біз қазақтың атадан балаға мирас болып келе жатқан тәрбиелік дәстүрлерімен қатар, халықтар достығын да дәріптедік. Тілі басқа болса да тілегі бір халықтың ынтымағы ел тыныштығын сақтаудың кепілі. Біз өзімізден кейінгі ұрпаққа осы достық пен ынтымақты, бабаларымыздың қасиетті дәстүрлерінен тағылым алуды мирас етуге міндеттіміз. Бүгінгі мереке осындай игі істердің жарасымды жаршысы болды", - деді Бауыржан Рахимов өз сөзінде.
Конкурс қорытындысы бойынша Алматы қаласы бойынша Қылмыстық-атқару жүйесі департаменті "Ең дәмді наурыз көже" конкурсының жеңімпазы атанды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!