Болашаққа қадам бүгіннен басталады
Бүгін Шымкент қаласының ішкі саясат және жастар істері жөніндегі басқармасының "Жастар ресурстық орталығы" КММ-нің ұйымдастыруымен "Болашаққа қадам" жобасы аясында бітіруші сынып оқушылары арасында коуч-тренерлердің қатысуымен семинар-тренинг өтті, - деп хабарлайды Tengrinews.kz тілшісі.
Мақсаты — жастарға кәсіби бағыт-бағдар беру, жас ұрпақты белгілі мамандықтың түрін меңгеруге бейімдеу, кәсіптік қызығушылығы мен қабілеттілігін дамыту.
Іс-шараға Шымкент ішкі саясат және жастар істері жөніндегі басқарма басшысы Мұратжан Шотанов, педагог-психолог Марал Жұмагелдіқызы, журналист Рахат Арғынбай және №65 мектеп-гимназиясы мен №25 мектеп-гимназиясының бітіруші сынып оқушылары қатысты.
"Президентіміз Қасым-Жомарт Кемелұлы Тоқаев өз сөзінде жастар туралы "Қазақстан – жас әрі жастардың мемлекеті! Жастарымыз – дамудың қозғаушы күші. Барлық мемлекеттік органдардың міндеті – жастардың өзін-өзі жақсы танытуына жағдай жасау және олардың оң бастамаларына қолдау көрсету" деген болатын. Осы мақсатта сіздерді болашақ өмірге дұрыс бағыттау, мамандық таңдауға сәтті қадам жасауларыңызды негізге ала отырып, "Болашаққа қадам" жобасын іске қостық. Бұл жобада – сіздерге кәсіби бағыт-бағдар беруге бағытталатын үлкен көмек болмақ", – деді Ішкі саясат және жастар істері жөніндегі басқарма басшысы Мұратжан Шотанов.
Алдымен оқушыларға мамандық таңдау бағытында коуч-тренерлер түсіндірме жұмыстарын жүргізіп, оқушыларға өз кеңестерін ұсынды. Коуч-тренерлердің ақпаратымен азықтанған оқушылар кәсіптік сала қызметкерлерінің жұмыс процесімен жақын танысу мақсатында "Бал Текстиль" ЖШС кәсіпорынына экскурсия жасады. Онда оқушылар кілем фабрикасының жұмыс ерекшеліктерімен, бұл саладағы сұранысқа ие мамандықтармен жақын танысты.
Сілтемесіз жаңалық оқисыз ба? Онда Telegram желісінде парақшамызға тіркеліңіз!