Хива Түрк дүйнөсүнүн маданий борбору болот
Мындай чечим Ош шаарында өтүп жаткан ТҮРКСОЙ эл аралык уюмуна мүчө өлкөлөрдүн туруктуу кеңешинин 37-отурумунда кабыл алынды.
Өзбекстандын Хива шаарынын акими Собир Жуманиязов эстафетаны кабыл алып, Хива шаары тууралуу баян жасады. 2020-жылы «Хива шаары - түрк дүйнөсүнүн маданий борбору» эл аралык салтанатынын аймак менен таанышуу, маданий иш-чаралар менен башталарын билдирди.
Хива шаары Өзбекстандын батыш бөлүгүндө жайгашкан. Шаарда ачык асман алдында 16-кылымдан бери тарыхый жайлар сакталып калган.
Ош шаары 2019-жыл үчүн «Түрк дүйнөсүнүн маданий борбору» болсо, буга чейин бул макамды Түркстан шаарынан тышкары Кастамону (Түркия), Мары (Түркмөнстан), Шеки (Азербайжан) жана Казан (Татарстан, Орусия) шаарлары алып жүргөн. (MdN)