پاکستان کې سېلابونه؛ د ناروغيو د خپرېدو او د خوړو د کموالي ويره پيدا شوې
تر اورښتونو وروسته سختو سېلابونو د پاکستان یو پر درېیمه برخه وځپله او پرون چهارشنبه هم په زیاتو سیمو کې د سېلابونو لړۍ روانه وه.
په پاکستان کې دغو سېلابونو چې د جون میاشتې له نیمايي ادامه لري، تر ۱۱۰۰ زیات کسان مړه کړي، شا و خوا یو ملیون کورونه یې تخریب يا هم نړولي او د پاکستان په لسګونو ملیونه وګړي یې اغېزمن کړي دي.
ملګرو ملتونو له پاکستان سره چې بېوزلۍ ځپلی د اضطراري مرستې لپاره د ۱۶۰ ملیون ډالرو په ارزښت رسمي درخواست یا اپیل خپور کړی دی.
له سېلاب ځپلو سیمو د خلکو د ایستلو لړۍ ورو شوې ده، خو د پاکستان د طبیعي افتونو د تنظیم ادارې ویلي، په پاکستان کې چې ۲۲۰ ملیونه وګړي لري، نږدې نیم ملیونه وګړي بېځایه شوي او په موقتي کمپونو کې شپې سبا کوي.
د خیبر پښتونخوا ایالت ویاند کامران بنګښ اسوشېټېد پریس اژانس ته وویل، دوی وېره لري چې په سېلاب ځپلو سیمو کې ښايي ځینې ناروغۍ خپرې شي.
د روغتیا نړیوال سازمان هم د هغو کسانو د درملنې په برخه کې د چارواکو مرسته پیل کړې، چې په وروستیو اورښتونو او سېلابونو کې ټپیان شوي دي.
په پاکستان کې د روغتیا نړیوال سازمان استازي ډاکټر پالیتا ماهیپالا (Dr. Palitha Mahipala) وویل: "دا مهال مو مهم لومړیتوب دا دی چې سېلاب ځپلو کسانو ته اساسي روغتیايي خدمات وړاندې شي. د دې تر څنګ د ناروغیو د څارنې، وقایې او کنټرول مېکانېزم قوي شي."
له سېلابونو ژوندي پاتې شوي کسان دا مهال په خېمو کې ژوند کوي چې درملو او د څښاک پاکو اوبو ته اړتیا لري.
د پاکستان صدراعظم شهباز شریف دا د پاکستان په تاریخ کې تر ټولو ناوړه سېلابونه بللي دي.
هغه پرون په خپله وینا کې وویل، چې د سېلابونو له کبله د وریجو یا شولو کروندې پو پناه شوي، مېوې او سبزیجات هم له منځه تللي دي.
په افغانستان کې هم وروستیو سېلابونو او تر هغه مخکې خونړۍ زلزلې خلکو ته د سر او مال درانه زیانونه اړولي دي.
وروستیو سېلابونو د افغانستان په ختیځ، مرکزي برخو او جنوب کې ډېر زیانونه اړولي او خلک وايي چې لا هم لازمې مرستې نهدي ورسره شوي.