Нафақаи муҳоҷирон
Русия ба ду пешниҳоди калидии Тоҷикистон дар масъалаи таъйини нафақаи муҳоҷирони меҳнатии тоҷик посух додааст.
Сафаралӣ Наҷмуддинов, директори Оҷонсии суғуртаи иҷтимоӣ ва нафақаи Тоҷикистон рӯзи 5-уми феврал зимни як нишасти хабарӣ дар Душанбе гуфт, пешниҳодҳо барои таъйини нафақа ба ду категорияи муҳоҷирни меҳнатӣ дар Русия ироа гардид. Оқои Наҷмуддинов иброз дошт, категорияи якум шаҳрвандоне ҳастанд, ки душаҳрвандӣ доранд ва категорияи дувум афродеанд, ки муҳоҷирати мавсимӣ доранд.
Оқои Наҷмуддинов гуфт, ба мақомоти Русия пешниҳод кардаанд, ки муҳоҷирони меҳнатие, ки дар баробари Тоҷикистон ҳамзамон шаҳрвандии Русия ва собиқаи меҳнатии 10-сола доранд, бар асоси қонунгузории Русия ба онҳо нафақаи суғуртавӣ таъин карда шавад. Дар мавриди муҳоҷироне, ки танҳо аз шаҳрвандии Тоҷикистон бархӯрдоранду муҳоҷирати меҳнатии мавсимӣ доранд, Сафаралӣ Наҷмуддинов гуфт, ба Русия пешниҳод кардаанд, ки корфармо пардохтҳои иҷтимоии онҳоро ба Тоҷикистон гузаронад.
"Муҳоҷирони меҳнатие, ки як сол ё шаш моҳ кор мекунанд собиқаи нафақаи суғуртавиро пурра таъмин карда наметавонанд, барои ҳамин мо пешниҳод кардем, ки ҷониби корфармо пардохтҳои иҷтимоие, ки дар оянда барои таъмини нафақаи муҳоҷирон ташаккул меёбанд, ба Тоҷикистон гузаронида шаванд”.
Ба қавли директори Оҷонсии суғуртаи иҷтимоӣ ва нафақаи Тоҷикистон ҷониби Русия дар посух ба ин пешниҳодҳо иброз доштааст, ки дар қонунгузории ин кишвар чунин муқаррарот пешбинӣ нагардидааст.
Сафаралӣ Наҷмуддинов таъкид намуд, бо ин вуҷуд, ин масъала дар баррасӣ буда, ҷониби Русия ва онҳо бояд дар сатҳи ҳукумати Русия қарорҳои дахлдор қабул намоянд. Русия ҳоло кишвари аслии кору даромади муҳоҷирони тоҷик ба ҳисоб меравад ва ҳар сол тахминан 1 миллион шаҳрванди Тоҷикистон ба он кишвар мераванд.