Баҳси бунёди манзили ду хоҳари нобино - мақомот замин доданд, ҳамсоя намегузорад. ВИДЕО
Як сокини ноҳияи Восеъ, ки нобинои модарзодӣ аст, мегӯяд, дар замине, ки расман барои ӯву хоҳараш ҷудо шудааст, наметавонанд манзил бунёд кунанд, чун ҳамсояаш ба ин кор мухолифат дорад. Мақомот мегӯянд, ки заминҳои Сафаралӣ Баротов ба фонди манзил гузаронида шудааст ва сокинон ҳақ доранд, ки дар он хона бунёд кунанд. Аммо Сафаралӣ Баротови ба ин кор розӣ нест ба додситонӣ шикоят бурдааст.
Ҳукумати ноҳияи Восеъ дар аввалҳои соли ҷорӣ ба Марҷона Динорова, сокини 34-солаи деҳаи Баҳористони ҷамоати Миралӣ Вайсов барои сохтмони манзил чаҳор сотих замин ҷудо намуд. Ҳоло баҳси ин замин ба додситонӣ кашида шудааст.
Марҷона Динорова рӯзи 4-уми декабр ба Радиои Озодӣ гуфт, чанд сол пеш барои ҷудо намудани замин ба ҳукумати ноҳия дархост пешниҳод кард ва барои ӯву хоҳараш, ки ӯ ҳам нобино мебошад, чаҳор сотих замини наздиҳавлигӣ ҷудо намуданд. Аммо ба гуфтаи Марҷона Динорова, хонаводаи ҳамсояашон Сафаралӣ Баротов, ки дар Душанбе низ тиҷорат доранд, алайҳи онҳо даъво намуда ва намегузоранд манзилашонро бунёд кунанд.
"Сафаралӣ Баротов ҳамсояаамон мешавад, аммо замини маро симтур гирифта, намемонад, ки хонаро бунёд кунем. Ба муовини раиси ноҳия Алихон Худоёрзода муроҷиат кардам, ӯ низ гуфт, рафта хонаатро бунёд кун, вале ин ҳамсояаамон, ки дар Душанбе соҳибкор аст, намемонад, ки хонаамро созем ва ҳоло ба додситонӣ ариза пешниҳод кардааст",-гуфт мусоҳиби мо.
Талошҳои мо барои дарёфти назари хонаводаи Сафаралӣ Баротов, ки даъвои соҳиби замин буданро доранд, натиҷае надод. Хонаводаи Баротовҳо баъди зангҳои пай дар пайи мо посухе надоданд ва телефонашонро хомӯш карданд.
Дар ҳукумати ноҳияи Восеъ низ хабари баҳси монеагузории хонаводаи Баротовҳо барои бунёди манзили ин ду хоҳари нобиноро тасдиқ карданд. Алихон Худоёрзода, муовини раиси ноҳияи Восеъ чоршанбеи 4-юми декабр дар сӯҳбат ба Радиои Озодӣ гуфт, он заминҳое, ки ҳоло ба сокинон дода шудааст, дар гузашта заминҳои деҳқонӣ буд, аммо бо фармони ҳукумати Тоҷикистон ба фонди манзил гузаронида шуд.
Худоёрзода гуфт, ки хонаводаи Баротовҳо дар оғоз нисбат ба қарори ҳукумати ноҳия ба ниҳодҳои интизомӣ шикоят бурданд, аммо мақомот, қазияро ба нафъи сокинон ҳал карданд. Ба гуфтаи Худоёрзода, ба ин нигоҳ накарда ҳоло хонаводаи Баротовҳо ба додситонӣ муроҷиат кардааст.
"Аввал ин заминҳо хоҷагии деҳқонӣ буд, вале ҳукумати ҷумҳурӣ онро ба фонди манзил гузаронд. Хонаводаи Баротовҳо дар онҷо 28 сотих замин доштанд ва ҳоло даъвои онҳо низ ҳамин аст. Ба дигар сохторҳои ҳифзи ҳуқуқ ариза доданд, аммо онҳо ҳал карданд ва ҳоло боз ба прокуратура ариза доданд",-гуфт муовини раиси ноҳияи Восеъ.
Хонаводаи Марҷона Динора мегӯянд, борҳо хайрхоҳоне пайдо шуданд, ки барои бунёди манзил омодагӣ карданд, вале афрод хонаводаи Баротовҳо монеи кори онҳо шуданд. Ҳоло Динора Марҷонова ба ваъдаи ҳукумат ҳам ба шубҳа менигарад.
Баҳси замину хона дар Тоҷикистон аз масъалаҳои доғ аст ва додгоҳҳои кишвар ҳар рӯз тақрибан ба ин монанд парвандаҳоро баррасӣ мекунанд. Баъзеҳо иддао доранд, ки замину хонаашонро беасос гирифтаанд, дигарон шикоят мекунанд, ки хонаашон ноодилона вайрон мешавад.
Баъзан додгоҳҳо низ наметавонанд баҳси хонаву заминро мувофиқи табъи дили даъвогарон ҳал кунанд ва он ба муноқишаву занозанӣ ва хунрезӣ кашида мешавад.