Игор Лякин-Фролов: Ҳаҷми маблағҳои ирсолкардаи муҳоҷирони тоҷик $ 3 миллиард мешавад
Игор Лякин-Фролов, сафири Русия дар Тоҷикистон гуфт, ҳаҷми маблағҳои интиқолии муҳоҷирони тоҷик аз Русия ба ватан дар соли 2019 ҳудуди 3 миллиард долларро ташкил хоҳад дод. Дипломати баландпояи Русия рӯзи 25 декабр дар мулоқот бо журналистони тоҷик дар Душанбе гуфт, ки бар асоси ҳисобҳои гуногун тақрибан як миллион муҳоҷири тоҷик, ки барои кор ба Русия рафтаанд, ба таври ҳамешагӣ дар ин кишвар қарор доранд ва ин муҳоҷирон дар як соли ахир ба маблағи 3 миллиард доллар барои наздиконашон ба ватан интиқол медиҳанд.
Сафири Русия дар Тоҷикистон ба он таъкид кардааст, ки маблағҳои ирсолкардаи муҳоҷирон дар рушди иқтисоди Тоҷикистон нақши муҳим дорад. Вай дар робита ба ҳамкориҳои иқтисодии ду кишвар гуфтаааст, дар 12 моҳи ахир миёни Тоҷикистону Русия дар ҳаҷми беш аз 1 миллиард доллар доду гирифт сурат гирифтааст.
Русия ба Тоҷикистон ғолибан нафт, маводи ғизоӣ ва мошину дигар таҷҳизот содир мекунад. Ба иттилои сафири Русия, дар ҳудуди Тоҷикистон беш аз 100 ширкати русӣ ва муштарак мисли “Газпромнефть”, “Мегафон” ва ғайра фаъолият доранд.
Русия дар солҳои охир макони аслии кору даромади садҳо ҳазор шаҳрвандони Тоҷикистон шудааст ва Маскав ҳамеша ин мавзӯъро ҳамчун имтиёзи муҳим ба ҳукумат ва шаҳрвандони Тоҷикистон арзёбӣ кардааст. Дар гузашта дар робита бо ҳодисаву таҳаввулоти ҳассос дар равобити ду кишвар муҳоҷирон борҳо мавриди фишори мақомоти Русия қарор гирифтааст.
Интиқоли 3 миллиард доллар аз сӯи муҳоҷирон дар як соли ахир дар ҳолест, ки як пурсиши Пажӯҳишгоҳи илмию таҳқиқотии Бонки Миллии Тоҷикистон маълум карда буд, наздики 70 дарсади хонаводаҳо дар кишвар аз ҳисоби муҳоҷират зиндагиро пеш мебаранд. Ин таҳқиқоте, ки бар пояи сӯҳбат бо беш аз 2 ҳазор сокини Тоҷикистон тобистони имсол анҷом шудааст, мегӯяд, боқӣ 30 дарсади аҳолӣ аз ҳисоби дигар -- кумакҳои хешовандон ва даромад аз ҷойи кор -- зиндагӣ мекунанд.