Кадом дастаҳои футбол ба Олимпиадаи Токио роҳ пайдо карданд?
Ҳамаи 16 иштироккунандаи мусобиқаи ниҳоии футбол дар Олимпиадаи Токио муайян шуданд. Охирин дастаҳое, ки ба Олимпиада роҳхат гирифтанд, тимҳои миллии Гондурас ва Мексика мебошанд. Бояд гуфт, ки онҳо дастаҳои ИМА ва Канадаро ба мусобиқаи олимпии футбол роҳ надоданд.
Дар бозии ниманиҳоии интихобии Бозиҳои олимпӣ дар минтақаи Конфедератсияи футболи Амрикои Шимолӣ, Марказӣ ва кишварҳои ҳавзаи Кариб (КОНКАКАФ), мунтахаби Гондурас тими миллии Иёлоти Муттаҳидаи Амрикоро бо ҳисоби 2:1 мағлуб кард. Дар бозии дигари ниманиҳоӣ мунтахаби Мексика тими миллии Канадаро бо ҳисоби 2:0 шикаст дод.
Ҳамин тариқ, рӯйхати ҳамаи иштироккунандагони мусобиқаи олимпии футбол дар Токио чунин аст:
• AFC - 4 даста: Ҷопон (мизбон), Кореяи Ҷанубӣ, Арабистони Саудӣ, Австралия.
• УЕФА - 4 даста: Фаронса, Олмон, Руминия, Испания.
• КАФ - 3 даста: Миср, Кот-д´Ивуар (Соҳили Оҷ), Африқои Ҷанубӣ.
• КОНМЕБОЛ - 2 даста: Аргентина, Бразилия.
• КОНКАКАФ - 2 даста: Гондурас, Мексика.
• OФК - 1 даста: Зеландияи Нав.
Қуръакашии мусобиқаи футбол 21-уми апрел дар қароргоҳи FIFA доир мегардад. Ёдовар мешавем, ки Бозиҳои тобистонаи олимпӣ аз 21-уми июл то 7-уми августи соли 2021 дар Токиои Ҷопон баргузор мешаванд.