9 медали муштзанҳои тоҷик дар қаҳрамонии Осиё

Варзишгарони тоҷик дар мусобиқоти қаҳрамонии бокси Осиё миёни наврасону ҷавонон дар шаҳри Остонаи Қазоқистон 9 медал (як нуқра ва ҳашт биринҷӣ) ба даст оварданд.

Ба иттилои Созмони бокси Осиё, дар мусобиқот миёни наврасон 220 варзишгар (147 писар, 73 духтар) ва байни ҷавонон 215 варзишгар (137 писар, 78 духтар) аз 23 кишвари қора ширкат карданд.

Ба ҳайати мунтахаби Тоҷикистон дар ин мусобиқоти қитъавӣ 24 варзишгар (13 наврас ва 11 ҷавон) дохил буд.

Медали нуқраро миёни наврасон Ҷаҳонгир Камолов дар вазни то 46 кило соҳиб шуд. Инчунин дар мусобиқоти наврасон Мансурхуҷа Муъминов (-48 кг), Билолҷон Иксанов (-50 кг), Абубакр Ғафуров (-66 кг), Зиёратшо Қосимов (-70 кг), Фариноз Абдулова (-52 кг) ва Мино Аъзамзода (-60 кг) бо медалҳои биринҷӣ сарфароз гаштанд.

Дар мусобиқоти наврасон намояндагони 12 кишвар барандагони медалҳои қаҳрамонии Осиё гардиданд.

Дар байни кишварҳо Ҳиндустон бо касби 10 медали тилло, 4 нуқра ва 7 биринҷӣ мақоми аввалро азони худ кард.

Қазоқистон бо касби 6 медали тилло, 8 нуқра ва 7 биринҷӣ мақоми дувум ва Узбекистон бо касби  4 нишони тилло, 7 нуқра ва 11 биринҷӣ мақоми севумро соҳиб шуданд.

Дар мусобиқоти ҷавонон бошад, варзишгарони тоҷик Меҳроҷ Суфиҷонов (-48 кг) ва Баҳромбек Ҳотамов (-71 кг) медали биринҷӣ гирифтанд.

Мусобиқоти ҷавонон имрӯз, 3-юми ноябр, бо қувваозмоиҳои ниҳоӣ ба поён мерасад. Аммо муштзанҳои ҷавони тоҷик натавонистанд ба финал роҳ ёбанд.

Ба ғолибону ҷоизадорони мусобиқоти қаҳрамонии бокси Осиё миёни наврасону ҷавонон ба ғайр аз медал мукофоти молӣ (ҷойи 1-ум - 1000 доллари ИМА, ҷойи 2-юм - 500, ҷойи 3-юм - 250) муқаррар шудааст.