د ملګرو ملتونو امنیت شورا د افغانستان په اړه غونډه کوي
د افغانستان لپاره د ملګرو ملتونو د استازولی دفتر یوناما په خپله ټویټرپاڼه کې ویلي چې په دې غونډه کې به چې د کابل پر وخت سبا د شپې په ۱۲ نیمو جوړیږي، د دې هېواد روان وضعیت وڅیړل شي.
د امنیت شورا دې غونډې ته به د افغانستان لپاره د ملګرو ملتونو د سرمنشي ځانګړې استازي او د یوناما مشره ډیبرا لاینز د افغانستان د وروستي وضعیت په اړه معلومات ورکړي.
د ملګرو ملتونو امنیت شورا داسې مهال د افغانستان وضعیت څېړي چې د ملګروملتونو مرستندویه ادارې هڅې کوي افغانستان کې میلیونونو کسانو ته چې د ژمي په رارسېدو سره خوړو او نورو اړینو موادو ته سخته اړتیا لري، مرستې ورسوي.
د خوړو نړیوال پروګرام«WFP» ویلي، شااوخوا ۹۵ سلنه افغانان کافي خوړو ته لاسرسی نه لري او له دې ډلې نژدې نهه میلیونه وګړي یې له قحطۍ سره مخامخ دي.