هند، چین او روسیې افغانستان سره د سمدستي بشري مرستو غوښتنه وکړه
له همدې کبله هندوستان، چین او روسیې د افغانستان د بشري وضعیت په اړه اندېښنه څرګنده کړې ده.
د هند د بهرنیو چارو وزیر اېس جی شنکر، د روسیې د بهرنیو چارو وزیر سرګي لاوروف او د چین د بهرنیو چارو وزیر وانګ یي د جمعې په ورځ د انټرنیټ له لارې په غیرحضوري توګه غونډه کې خبرې وکړې.
دوی تر دې غونډه وروسته یوه ګډه اعلامیه خپره کړه چې په کې ویل شوي: "افغانستان کې د خرابېدونکي بشري وضعیت په اړه د اندېښنې په څرګندولو سره، وزیرانو له افغانستان سره د سمدستي او بې خنډه بشري مرستو غوښتنه وکړه."
په اعلامیه کې پر طالبانو غږ شوی چې د افغانستان په اړه د ملګرو ملتونو د قوانینو د نتایجو او په دې هېواد کې د ملګرو ملتونو مرکزي رول ته دې درناوی وکړي.
دغه راز درې واړو هېوادونو ژمنه وکړه چې سیمه کې به د نشه يي توکو د قاچاق پر وړاندې په مبارزه کې همکاري زیاته کړي.
اعلامیه زیاتوي: "د افغانستان او له دې هېواده د تاریاکو، میتامفیتامین او داسې نورو نشه يي توکو د ناقانونه قاچاق خپرېدل د سیمې امنیت او ثبات ته جدي تهدید پېښوي او د ترهګرو سازمانونو لپاره د تمویل زمینه برابروي."
طالبان د اګسټ میاشتې په پنځلسمه نېټه کابل ته ننوتل او په افغانستان کې يې خپل واک اعلان کړ، خو تراوسه یې د کوکنارو د نه کرلو په اړه هېڅ رسمي اعلاميه نه ده خپره کړې.
د یادولو وړ ده چې تر دې یوه ورځ مخکې د طالبانو د کورنیو چارو وزارت ویاند قاري سعید خوستي پر خپله ټویټر پاڼه لیکلي و چې طالبانو د جرمني له سي فارم شرکت سره یو قرارداد لاسلیک کړی چې پر اساس به یې دا شرکت په افغانستان کې د بنګو بوټي کري او چرسو ته تر رسېدو مخکې به یې باسي.
چرس او تریاک په تېرو۲۰ کلونو کې د افغانستان د پخواني حکومت او امریکا پرضد د طالبانو د جګړې د تمویل مهمه سرچینه ګڼل کېده.