ایران کې د اوبو په خاطر اعتراض؛ تر اوسه امنیتي ځواکونو ۲۱۴ لاریون کوونکي نیولي
ایراني ځواکونو په اصفهان کې سلګونه مظاهرهچیان نیولي دي.
تر پرون ناوخته په اصفهان کې ایراني ځواکونو ۲۱۴ هغه مظاهرهچیان نیولي چې د اوبو د ناورین په خاطر د اعتراض په پار وتلي وو.
د مظاهرهچیانو د ځپلو او نیولو ګڼې وېډیوګانې په خواله رسنیو خپرې شوي.
په یوه کې یې د اصفهان یوه څنډه کې یوه ډله خلک د پولیسو لهخوا د ټپي شوي سپين ږیري شااوخوا ورټول دي.
ډډهیې له ساچمو ډکه ده. ده ته ورته لسګونه کسان د پولیسو لهخوا ټپيان شوي.
د ایران امنیتي ځواکونو د اصفهان په ګوټ ګوټ کې د مظاهرو د ماتولو او مخنیوي لپاره په خلکو باندې اوښکې بهوونکی ګاز او ربړي مرمۍ کارولي دي.
د ایران د بشري حقونو سازمان راپور ورکړی چې ۳۰ تنه مظاهرهچیان په سترګو لګېدلي او ژوبل شوي. ټپيان دمګړی روغتونو ته وړل شوي.
واشنګټن مېشتي ایراني کارپوه علي افشاري د ازادې اروپا/ فردا راډیو سره په مرکه کې ایراني ځواکونه تورن کړل چې مظاهرې یې قصداً په تاوتریخوالي واړولې.
افشاري وایي: "د معترضانو خیمې یې ټولې کړې او اور یې ورواچاوه. له هغه ځایه وو چې وضعیت غیر عادي شو او د تل په څېر یې مظاهرې په تاوتریخوالي واړولې. هڅهیې وکړه چې فضا غیر طبیعي شي او له هغه وروستهیې خلکو سره برخورد وکړ او ویېځپل."
د ایران د بشري حقونو سازمان زیاتوي چې د مظاهرهچیانو د نیولو لړۍ لا هم روانه ده او ګڼیې سپين ږیري کلیوال دي چې د شپې مهال د اصفهان له یوه محبسه نامعلوم ځای ته وړل شوي.
ایراني چارواکي بیا په دوو ورځو کې د نږدې ۲۰۰ کسانو د نیولو خبر ورکړی او ویلي یې دي چې پولیسو په پوره احتیاط د زیات شور مخه نیولې ده.
د ایران په اصفهان کې زرګونه کسان چې اکثر یې بزګر دي د اوبو د کمېدو او رامنځته شوي ناورین په غبرګون راوتلي.
د ایران لوړپوړو چارواکو تر اوسه د دې مظاهرو په اړه څه نهدي ویلي.
خو مخکې د ایران په پارلمان کې د اصفهان د خلکو استازو او امنیتي چارواکو دا مظاهرې د دوی په خبره د دښمن کار او انقلاب ضد کړیو پورې تړلې بللي.
په ایران کې د مظاهرهچیانو ځپل یوه اوږده مخینه لري.
د ۱۳۹۸ کال په لړم کې د ایران په ټولو ښارونو کې لکونه خلکو د اقتصادي ستونزو، بېروزګاریو او د چارواکو پر ضد لاریون ته ووتل چې په پراخه کچه وځپل شول.
د امریکا د هغه وخت ادارې ویلي و چې ایراني پوځيانو او بسیجیانو شااوخوا یو نیم زر مظاهرهچیان وژلي او زرګونه نور یې ټپیان کړي دي.
دا تورونه ایراني چارواکو رد کړي وو او یوازې یې د شااوخوا ۲۲۰ کسانو وژل کېدل تأیید کړي و.