Додгоҳ ҳукми Кабир Кабировро тайғир дод ва 10 сол зиндонӣ кард
Додгоҳи ноҳияи Исмоили Сомонии шаҳри Душанбе баъд аз муҳокимаи дигарбораи парвандаи Кабир Кабиров, писари Аваз Кабиров – молики бозори “Султони Кабир” – ҳукми ӯро тағйир дод ва 10 сол зиндонӣ кард. Ӯ давраи ҷазои худро дар зиндони низомаш умумӣ сипарӣ хоҳад кард.
Кабиров моҳи июли имсол ҳаштуним сол аз озодӣ маҳрум шуда буд. Вале даъвогарон ҳукми ӯро сабук дониста, ба баррасии дубораи парванда пойфишорӣ карданд.
Ҳукми нави додгоҳ рӯзи 2-юми октябр содир шуд. Ҳанӯз вокуниши пайвандони Кабир Кабиров дастрас нест. Даъвогарон гуфтанд, ба зудӣ дар ин бора изҳори назар мекунанд.
Кабир Кабиров дар моҳи марти имсол дар хиёбони марказии Душанбе бо худрави тамғаи "Лексус" ба садама дучор шуд ва дар ин ҳодиса ду нафар аз ҳамроҳонаш – Саидҷаъфар Саидов ва Некзод Саҳобиддинзода (ҳарду 19-сола) ҷон бохтанд.
Тарафи даъвогар иддао дошт, ки Кабиров дар лаҳзаи рондани мошин сархуш буд ва ба ҳамин далел бояд ҷазои сахттар гирад. Ҳоло маълум нест, ин иддаои ҷониби даъвогар дар додгоҳ тасдиқ шудааст, ё не.
Ин масъала дар мурофиаи рӯзи 30-юми сентябр низ дар Додгоҳи ноҳияи Исмоили Сомонии пойтахт баррасӣ шуда буд. Мақомоти Раёсати корҳои дохилии шаҳри Душанбе дар лаҳзаҳои аввали баъди садама гуфтанд, Кабир Кабиров “бо сабаби баланд намудани суръати ҳаракат аз ӯҳдаи идораи мошин набаромада, аввал ба девори бетонии канори роҳ ва баъдан ба симчӯби оҳанӣ бархӯрдааст”.
Ҳодиса дар маркази Душанбе ва начандон дур аз муҷассамаи Исмоили Сомонӣ дар дили шаҳр рух дод. Кабир Кабирови 19-сола донишҷӯи соли якуми факултаи муносибатҳои байналмилалии Донишгоҳи миллии Тоҷикистон буд.
Ҳоло рӯшан нест, якуним сол зиёдтар шудани муҳлати ҷазои Кабир Кабиров бар асоси кадом далел аст. Мақомоти додгоҳ ҳозир нашуданд, ҷузъиёти парвандаро ошкор кунанд.
Солҳои охир чанде аз садамаҳо бо иштироки фарзандони мақомоти тоҷик ва афроди шинохтаву сарватманд рух додааст. Мунтақидон онҳоро барои суистифода аз мақому нодида гирифтани қонунҳо муттаҳам мекунанд. Бархеи дигар мегӯянд, ки садама тасодуфист ва аз кӣ чикора будани одам вобаста нест.
Дар Тоҷикистон ҳар сол садҳо нафар дар садамаҳои нақлиётӣ ҷон медиҳанд ва ҳазорон нафари дигар захмӣ ва маъюб мешаванд.
Дар тақрибан ду соли охир дар Тоҷикистон бар асари садамаҳои нақлиётӣ беш аз 700 нафар ҷон бохта ва беш аз 2300 тан маҷрӯҳ шудаанд.