Красноуфимск шәһәрендә «Ак Барс» хоккей клубы призына турнир җиңүчеләре билгеле
(Казан, 2 март, «Татар-информ»). 26 февральдә Красноуфимск шәһәренең Үзәк стадионындагы хоккей мәйданчыгында балалар командалары арасында «Ак Барс» хоккей клубы һәм Бөтендөнья татар конгрессы призларына хоккей буенча Свердловск өлкәсе турниры булды. Бу хакта Татарстан Республикасының Свердловск өлкәсендәге Даими вәкиллеге сайты хәбәр итә. Ярышларны Татарстан Республикасының Свердловск өлкәсендәге Даими вәкиллеге, Бөтендөнья татар конгрессы, «Татнефть-Ак Барс «СКП» җаваплылыгы чикләнгән җәмгыяте, Татарстан Республикасының яшьләр эшләре һәм спорт министрлыгы, Свердловск өлкәсенең физик культура һәм спорт министрлыгы, Свердловск өлкәсенең Красноуфимск шәһәр округы администрациясе оештырды. Уен нәтиҗәләре:
1 урын — «Сокол» командасы (Красноуфимск шәһәре).
2 урын — «Барда» командасы (Барда).
3 урын — «Ермак» командасы (Кунгур).
Җиңүчеләр һәм призерлар истәлекле призлар һәм Бөтендөнья татар конгрессы кубогы белән бүләкләнде.