КФУ профессоры алдагы бәйрәм көннәрендә аномаль салкыннар турында кисәтте
(Казан, 5 март, «Татар-информ», Наталья Рыбакова). Казанда март башында булган җылы һава торышына алмашка аномаль салкыннар килде.
«Суыту Кара диңгез районында, көньяктагы актив циклогенезга бәйле. Безгә циклон якынлашты һәм салкын арктик һава агымы ачылды. Санкт-Петербургта һәм башка кайбер шәһәрләрдә күпкә салкынрак булачак. Хәзер Казанда уртача тәүлеклек температура -6 градус булырга тиеш, ә чынлыкта ул 6 мартта нормадан 5-6 градуска түбәнрәк булачак. Бу март түгел, ә февраль һава торышы булырга тиеш», — диде профессор, география фәннәре докторы Юрий Переведенцев.
Кышны озату һәм халык күңел ачулары 6 мартта салкын һава торышында булачак. Татарстан башкаласында көндез -9 градус, ә дүшәмбегә каршы төндә -18 градус булыр дип көтелә. Халыкара хатын-кызлар көнендә — 8 мартта да салкын була, температура 7 градуска кадәр төшәчәк. Салкын аномалия кимендә декада дәвамында була.
«Салкыннар 12 мартка кадәр булачак. Киләсе декадада салкын аномалия 4 градус була. Әгәр климатик карталарны ачып карасак, зәңгәр казан, зәңгәр төс, салкын һава күрәбез», — диде профессор.
КФУ профессор әйткәнчә, якын арада Казанда көчле явым-төшемнәр көтелми. Аның сүзләренчә, март аенда Казанда уртача температура нормасы -3,2 градус, ә явым-төшемнәр күләме 33 мм булырга тиеш. Татарстан Гидрометеорология үзәге мәгълүматларына караганда, Татарстанның бөтен территориясендә салкын булачак.
«Шимбә көнне, 5 мартта, республика актив көньяк-көнчыгыш циклонының тыл өлешендә кала һәм һава торышы сизелерлек начарланачак. Кар, җепшек кар ява, кайбер районнарда явым-төшемнәр көчле булачак, урыны белән буран, секундына 15-20 метр тизлеккә җитә торган көчле җил көтелә. Төнлә һава температурасы -3…-8, көндез -4...1 градус. Юлларда бозлавык, урыны белән кар көртләре барлыкка киләчәк», — диелә ведомство сайтында.
Якшәмбе көнне, 6 мартта, төнлә һәм иртән кар явачак, урыны белән буран, көчле җил була. Циклонның ераккарак, көнчыгышка китүе һәм атмосфера басымы арту аркасында, явым-төшемнәр әкренләп кимиячәк. Төнлә һәм иртән 12, аязганда 15, ә көндез 5 градус салкын булуы көтелә.
Киләсе атна башында, 7 һәм 8 мартта республикада салкын һава торышы саклана. Төнлә -13..-20, көндез -4..-10 градус була. Урыны белән бераз кар яварга мөмкин.