Роспотребнадзор: «Стелс-омикрон» штаммы пандемиянең яңа дулкынын чыгармаска тиеш
(Казан, 16 март, «Татар-информ»). «Стелс-омикрон» коронавирусының яңа варианты (ВА.2) Россиядә пандемиянең яңа дулкынын китереп чыгармаска тиеш. Мондый фикерне Роспотребнадзор эпидемиология фәнни-тикшеренү институтының секвенлаштыру технологияләре нигезендә диагностикалауның яңа ысулларын эшләү фәнни төркеме җитәкчесе Камил Хафизов әйткән. Бу турыда РИА Новости яза. Ул билгеләп үткәнчә, халыкның күп өлеше инде чирне авырып уздырды яки прививка ясатты. Авырулар саны дәрәҗәсе, «стелс-омикрон» белән авыручылар саны артуга карамастан, сизелерлек кимеде. «BA.2 сублиниясенең Россиядә пандемиянең яңа дулкынын чыгаруы шикле. Халыкның бик күп өлешенең иммунитеты бар. Алар вакцинация узган һәм/яки яңа коронавирус инфекциясе белән авырган», — дип аңлатты эксперт.