Быел Татарстанда 67 парк, сквер һәм төзекләндерелгән яр буе барлыкка киләчәк
(Казан, 17 март, «Татар-информ», Эльза Кузнецова). Быел Татарстанның 49 торак пунктында иҗтимагый киңлекләрне тәртипкә китерү күздә тотыла. Барлыгы 67 объект барлыкка киләчәк, шуларның 65е төзеләчәк, икесенең проекты әзерләнәчәк. «Татарстан Республикасы шәһәрләрен үстерү институты» фондының Архитектура проектлары департаменты җитәкчесе Наилә Зиннәтуллина шул хакта хәбәр итте.
Аерым алганда, быел Татарстанда ун яңа парк һәм сквер пәйда булыр дип көтелә, шуларның дүртесе – Казанда, калганнары – республика муниципаль районнарында. Иң көтеп алынган проектларның берсе – август ахырында «Салават күпере» торак комплексында ачылачак парк.