(Казан, 22 март, «Татар-информ», Дмитрий Киселев). Әфганстан татар җәмгыяте Татарстан Республикасы Президенты Рөстәм Миңнехановка һәм республиканың бөтен халкына Нәүрүз бәйрәме уңаеннан видеокотлау яздырган. «Мин Әфганстан, бигрәк тә Саманган провинциясе халкы исеменнән Татарстан Президентын, Татарстанның һәм бөтен дөньяның барлык халкын 1401 нче кояшлы Яңа ел белән котлыйм. Әфганстан татарлары Татарстан һәм Әфганстан арасында урнашкан яхшы һәм дустанә мөнәсәбәтләрне югары бәяли. Без бу мөнәсәбәтләр нык һәм какшамас булып калыр дип ышанабыз. Ниһаять, Әфганстан Советы башлыгы Захибулло Надери һәм Казан хәйрия фонды җитәкчесе Рөстәм Хәбибуллинга татар милли мөнәсәбәтләрен җайлауга багышлаган вакытлары һәм тырышлыгы өчен рәхмәт сүзләрен җиткерәбез. Әфганстан белән Татарстан арасындагы дуслык яшәсен», — диелә видеокотлауда. Нәүрүз — борынгыдан килгән игенчелек бәйрәме. Әфганстанда аны шулай ук Руз-е Дехкан («Крестьян көне») яки Руз-е Нехолышони («Үсентеләр утырту көне») дип атыйлар. Бу көнне әфганчылар яңа киемнәр кия һәм табын әзерли. Табында төп ризык — хавт мива, ким дигәндә җиде өлештән торган кипкән җиләк-җимеш һәм чикләвек, шыттырылган бодай үсентеләреннән әзерләнгән сумәләх. Бу көнне шулай ук җир сөрү ярышлары һәм атта бузкаши уеннары уза.
