د غزني له سقوط وروسته ملي امنیت د دغه ولایت والي داوود لغمانی ونیو
د طالبانو په لاس د غزني ښار د ځینو سیمو له سقوط وروسته، د دغه ولایت والي داوود لغمانی د کورنیو چارو وزارت د کورني امنیت ریاست له لوري ونیول شو.
د کورنیو چارو وزارت د دغه خبر په تأیید سره ازادي راډیو ته وویل چې له نوموړي څېړنې کېږي.
د غزني ولایت ډیری سیمې نن له غرمې وروسته طالبانو سقوط کړې دي.
د کورنیو چارو وزارت ویاند میرویس ستانکزي د دغه خبر د منلو ترڅنګ ازادي راډیو ته وویل چې د غزني والي، مرستیالیې، د دفتر رئیسیې او ځیني نور هغه کسان چې ورسره وو په میدان وردګو ولایت کې د کورنیو چارو وزارت د امنیت د عمومي ریاست له لوري نیول شوي دي.
ښاغلی ستانکزی زیاتوي: "جګړې په ډېریو ولایتونو کې روانې دي، خو هغه څه چې نن په غزني کې پېښ شول او کوم پرمختګونه چې طالبانو درلودل، خو امنیتي او دفاعي ځواکونه لا هم د غزني په ځینو سیمو کې شته او مرستې او تازه نفسه ځواکونه زیانمنو سیمو ته رسېدلي او رسېږي او ژر به طالبان په شا وتمبول شي."
له دې وړاندې په ټولنیزو رسنیو کې ځینې وېډیوګانې او انځورونه خپاره شول چې ښیي د غزني والي داوود لغمانی د غزني ولایت له سقوط وروسته د طالبانو تر ولکې لاندې سیمو کې له څو تعقیبي موټرو سره کابل ته په خوندي ډول د حرکت په حال کې دی.
په وېډیوګانو کې لیدل کېږي چې وسلهوال طالبان د غزني د والي موټر نه راتاو دي او له دې پېښې وېډیوګانې اخلي.
په وېډیوګانو کې اورېدل کېږي چې طالبان وایي: "دا د غلام دولت د والي موټرونه دي."
د غزني ولایتي شورا مرستیال امانالله کامراني ازادي راډیو ته ویلي چې طالبانو د ولایت مقام، امنیه قومانداني، دوهمه ناحیه او د دغه ولایت زندان نیولی، خو په خبرهیې ځینې سیمې لا هم د دولت په کنټرول کې دي.
کامراني زیاته کړه: "اول قومانداني سقوط شوه بیا یې ولایت ور پرېښود، بیا نورو پرسونل چې څه نا څه مقاومت کاوه، خو متاسفانه چې دا مقاومت هم لنډمهاله و، د غزني ښار بشپړ سقوط دی، څه په کې نه دي پاتې، یوازې د ۹۰۹مه لوا پاتې ده."
بل خوا طالبان وایي، د غزني ښار سقوط شوی دی.
د دغې ډلې یو ویاند ذبیح الله مجاهد ازادي راډیو ته وویل چې د والي په ګډون دولتي چارواکو دا ولایت پرېښی او کابل ته انتقال شوي دي.
طالبانو په تېره یوه اوونۍ کې د هېواد ۹ ولایتونه جوزجان، سرپل، سمنګان، تخار، بدخشان، فراه، نیمروز، کندز او غزني کې ولکه ټینګه کړې ده.
همدا راز تېره ورځ ازادي راډیو ته یوې سرچینې تایید کړه چې طالبانو د کندهار زندان هم تر خپل کنټرول لاندې راوستلی او ټول بندیان یې خوشې کړي دي.
په فراه ولایت کې هم ورته کیسه ده.
د دغه ولایت د ولایتي شورا غړي محمد نورزي ازادي راډیو ته وویل چې طالبانو له جګړې پرته دا ولایت نیولی او امنیه قوماندان او والي ترې تښتېدلي دي.
په کابل کې د امریکا سفارت هم په خپله ټویټرپاڼه لیکلي چې دوی طالبانو ته د افغان امنیتي او دفاعي ځواکونو د تسلیمېدو او د طالبانو له لوري د هغوی د اعدام کولو په اړه ډېر راپورونه تر لاسه کړي دي.
د دغه سفارت د چارواکو په حواله لیکل شوي چې "ژور اندېښمن یو او دا جنګي جنایت دی، د طالبانو له لوري د جګړو زیاتېدل، د افغان تسلیم شوېو ځواکونو اعدامول، د بشري حقونو سرغړونه ده."
دغه سفارت له طالبانو غوښتي چې په افغانستان کې د بشري حقونو ۲۰کلنې لاسته راوړنې له منځه مه وړئ.
د ملي دفاع او کورنیو چارو وزارتونو چارواکو د امریکا سفارت د څرګندونو او پر ښارونو د طالبانو د حملو د زیاتېدو په اړه څه نه دي ویلي.
دا په داسې حال کې ده چې د افغانستان پر ځینو ښارونو د طالبانو د حملو له زیاتوالي وروسته تېره ورځ مارشال عبدالرشید دوستم د جګړې د مدیریت لپاره د دغه هېواد شمال ته ولاړ.
بل خوا هیبت الله علي زی د لوی درستیز په توګه ټاکل شوی.
په افغانستان کې پر ښارونو د طالبانو حملې داسې وخت تیزې شوي چې د افغان حکومت د سولې مرکچي پلاوی په دوحه کې په درېیمه او وروستۍ ناسته کې هڅه کوي چې طالبان پر ښارونو او مرکزونو حملې بندې کړي.