Германия балалар каналы татар мәдәнияте турында фильм төшерү өчен Алабугага килгән
(Алабуга, 7 гыйнвар, «Татар-информ», « Алабуга нуры »). Алабуга районының Морт авылы клубында балалар өчен чыршы бәйрәме үткәрделәр. Германия иҗтимагый балалар каналы балаларның Чыршы бәйрәмен төшерде.
Аларның максаты — татар мәдәнияте, аерым алганда, Кыш бабай һәм Кар Кызы катнашында Яңа елны каршылау һәм бәйрәм итү турында фильм төшерү.
Бәйрәмдә балалар «Йөзек салыш», «Капкалы», «Чүпләмле» халык уеннарын яратып уйнады, чыршы тирәсендә әйлән-бәйлән йөрде, төрле бәйгеләрдә катнашты. «Яшьлек» ансамбле тамашачыга биюләр тәкъдим итте. Ә Кыш бабай белән Кар кызы татлы бүләкләр өләште.
Авыл халкы оештыручыларга үзләренең рәхмәтләрен җиткерә.