Казанда чыршы агачларын кабул итү пункты ачылды
(Казан, 10 гыйнвар, «Татар-информ»). Бүген Казанның Гадел Кутуй урамы, 160нчы йорт адресы буенча чын чыршыларны кабул итү пункты эшли башлады. Теләге булган һәр кеше чыршы, нарат, ак чыршы яки ылыслы агач ботаклары җыелмасын алып килә ала. Агачлар тәүлек буе кабул ителә. Бу хакта «Татарстан 24» телеканалы сайтында хәбәр ителә. Ылыслы агачларны Татарстанның фермерлык хуҗалыкларына җибәрәчәкләр. Яңа ел агачлары терлекләр өчен витаминлы өстәмә ризык булачак. Төп шарт ылыслы агачлар бизәлмәгән булырга тиеш.