Мишустин Хөкүмәтне һәм федераль министрлыкларны дистанцион эшләүгә күчерергә кушты
(Казан, 21 гыйнвар, «Татар-информ»). Россиянең премьер-министры Михаил Мишустин илебезнең Хөкүмәтен һәм федераль хакимият органнарын эш һәм киңәшмәләр уздыруның дистанцион форматына күчерергә кушты. Бу хакта Хөкүмәтнең рәсми Telegram-каналы хәбәр итә.
Аерым алганда, 21 гыйнвардан вице-премьерлар, Хөкүмәт Аппараты һәм шулай ук федераль министрлыклар һәм ведомстволар, аларның территориаль бүлекчәләре һәм ведомство карамагындагы оешмаларның киңәшмәләре мөмкин булганча дистанцион форматта уздырылырга тиеш.
Моннан тыш, Хөкүмәт Аппараты, федераль хакимият органнары һәм Хөкүмәт каршындагы Аналитик үзәк үз хезмәткәрләрен 21 гыйнвардан башлап мөмкин булганча читтән торып эшләү режимына күчерүне тәэмин итәргә тиешләр.