Алабугада быел 23 күп фатирлы йорт капиталь төзекләндереләчәк
(Алабуга, 30 гыйнвар, «Татар-информ», «Алабуга нуры» ). Алабугада быел 23 күп фатирлы йорт капиталь төзекләндереләчәк. Торак-коммуналь хуҗалык һәм төзелеш департаменты директоры Андрей Томилин билгеләп үткәнчә, йорт тышлары, түбәләре төзекләндерүгә мохтаҗ, инженерлык системаларына ремонт кирәк, лифтларны алыштырасы бар. Шул рәвешле, 15 йортның фасадын төзекләндерергә уйлыйлар, 7 йортны тулысынча җылытулы итеп төзекләндерәчәкләр. Шәһәрнең тарихи өлешендә быелгы капиталь ремонт программасына Олы Покров урамындагы 11 йорт та кергән, ул мәдәни мирас объекты булып тора. Былтыр аңа проект-смета документлары әзерләнгән иде. Финанслау лимиты быел 155,2 миллион сум тәшкил итте. «Февральдә Татарстан Министрлар Кабинеты Карарына төзәтмәләр көтәбез. 2021 елда башкарылган эш нәтиҗәләре буенча экономия суммасы быелга күчереләчәк һәм ул 160 миллион сум тирәсе булачак. Программа лимиты арту хисабына, өстәмә рәвештә тагын 3 күпфатирлы йортны кертергә планлаштырыла, алар өчен аерым җылыту пунктлары урнаштырылачак», — диде Андрей Томилин.