Мәгариф министрлыгы мәктәпләргә шимбә саф һавада чаралар үткәрергә тәкъдим итте
(Казан, 11 февраль, «Татар-информ»). Татарстан Мәгариф һәм фән министрлыгы мәктәпләргә шимбә көнне саф һавада чаралар үткәрергә тәкъдим итте. «Һәр шимбәдә республика мәктәпләрендә чараларны сыйныфларда түгел, ә саф һавада — мәктәп яны территориясендә спорт, мәдәни-танып белү акцияләре үткәрергә тәкъдим ителә. Һәр мәктәп балаларны эш белән тәэмин итү форматын сайлый», диелә Татарстан Мәгариф һәм фән министрлыгы хәбәрендә. Ялларда мәгариф оешмаларында генераль җыештыру һәм бактерицид лампалар ярдәмендә зарарсызландыру уздырыла. Моннан тыш, укучылар һәм укытучылар мәктәпләрдә иртәнге медицина фильтры уза. Бүген 553 укучының температурасы булу сәбәпле, алар дәрескә кертелмәде. Грипп һәм тын юлларында вируслы кискен инфекция (ОРВИ) аркасында 96 мәктәптә сыйныфлар карантинга җибәрелгән.