(Казан, 17 февраль, «Татар-информ», Алёна Низамова). Сәләт мәктәбенә бина булдыру мәсьәләсе әлегә хәл ителмәгән. Хәзерге вакытта шул юнәлештә эшлибез, дип белдерде ТР Яшьләр эшләре министры Тимур Сөләйманов «Татар-информ» журналистына. «Кызганыч, әлегә төгәл җавап юк. Әлегә Казандагы 51нче урта гомуми белем бирү мәктәбе базасында „Асылташ“ Сәләт мәктәбе эшли. Беренче һәм икенче сыйныф бар. Шулай ук „Адымнар“ мәктәбе базасында да „Сәләт“ сыйныфлары эшли. Бу класслар „Сәләт“ оешмасыннан методик яктан алып барыла. Минемчә, без бу практиканы киләсе елга да алып барачакбыз. Күпмедер вакыттан соң „Асылташ“ мәктәбе аерым мәктәп булып үсеп чыгар дип уйлыйбыз», — дип белдерде ул. Хәзерге вакытта «Асылташ»та 1Ә һәм 2Ә сыйныфларында белем бирәләр.