(Питрәч, 20 февраль, «Татар-информ», « Алга », Люция Сираҗиева). Питрәч районының Көек авылында «Әкият» һәм Богородскийда «Алтын ачкыч» балалар бакчалары ачылды. Мәктәпкәчә учреждениеләрне ачу тантанасы абруйлы кунакларның сәламләү сүзе, кызыл тасма кисү, символик ачкыч тапшыру, экскурсия һәм концерт белән үрелеп барды. Биналар ике катлы, аларда иркен якты бүлмәләр, төсле стеналар һәм шкафлар, йомшак келәмнәр, мавыктыргыч уен зоналары һәм уңайлы караватлар бар. «Без ачылдык, сезнең балагыз бакчага йөри ала», — дип әйтүләрен ата-аналар түземсезләнеп көтте. Элек күпләр үз балаларын Казанның шәхси учреждениеләренә йөрткән, мондый мөмкинлеге булмаганнар — озакка сузылган декретта утырырга мәҗбүр булган. Балаларга, барыннан да бигрәк, гимнастикада кулланыла торган һәм төрле конструкторлар төзи торган йомшак кабартылган модульләр ошый. Алар шулай ук тренажерларны, зур тупларны яраталар, анда утырырга һәм сикерергә була, коры бассейнда «коену» бик ошый аларга. Һәр объектта, зур спорт залыннан тыш, музыка дәресләре һәм бәйрәм чаралары үткәрү өчен актлар залы бар. Богородскийдагы яңа бакчага иске бинадан тәрбиячеләр һәм балалар күченгән. Өстәмә рәвештә балалар һәм педагоглар туплган. Нәтиҗәдә, анда 120 бала йөриячәк. Көек балалар бакчасына 220 бала барачак, ел дәвамында урыннарны тагын 100гә арттыру планлаштырыла. Көектә тагын 1415 кеше балалар бакчасына чират көтә. Район башлыгы Илһам Кашапов ТР Мәгариф һәм фән министры Илсур Һадиуллинның игътибарын әлеге проблемага юнәлтте. Министр республика һәм федераль программаларның авыл территорияләрендә инфраструктураны үстерү эшен дәвам итәчәген билгеләп үтте.
